Shillong, Risaw 31 : U President ka BJP Bah Ernest Mawrie hynne ka sngi nyngkong ula ai khublei ia u Myntri Rangbah Duh ka Ri Narendra Modi halor ka jingshim ia ki sienjam ban pynbun ia ki lad pyniasoh da ki liengsuin ia ka Nongbah Shillong bad kiwei pat ki Jylla jong ka Ri.
Ha ka kyrwoh, u Bah Ernest ula ong, la slem bha ba ka Kad Liengsuin ha Shillong ka dei kaba khlem pyndonkam bad kaba isangsot bha hynrei mynta kala ai ka jingshakri ia palat hajar ngut ki passenger manla u bnai.
Kane ka jingkylla kala mih da ka jingiohi jngai jong u Myntri Rangbah Duh ka ri, ki policy jong u ia ka NE bad rih ia ka model jong ka BJP ban pynroi ia ka thain, ong u Bah Ernest.
U Bah Ernest ula ai khublei ia u Myntri ka tnad Civil Aviation, Jyotiraditya Scindia halor ka jingot ribbon ia ka jingshakri jong ka Liengsuin Alliance Air ka ban pyniasoh ia ka Shillong bad ka Lilabari ha Assam.
Ula ong ruh ba hadien ka jingthaw ia ka Sorkar ba thymmai, ka BJP kan pynthikna ba ka Shillong ka dei ban iasoh bad kiwei pat ki Nongbah jong ka Ri da ka liengsuin.
