Shillong, Nohprah 09 : Ka North East Students Organization (NESO) kala pynbna ban pynlong da ka jingiawah lama iong bad banner iong ha baroh 7 tylli ki Jylla ka thain Shatei Lam Mihngi ha ka 11 tarik Nohphrah, kum ka dak ban pynpaw jingpyrshah ia ka Citizenship (Amendment) Act,2019.
Ka Citizenship (Amendment) Act, 2019 ka dei kaba ailad ban ithuh Nongshongshnong ia ki poiwir ki bym dei ki Muslim ba wan phet na Bangladesh, Pakistan bad Afghanistan.
Ha ka kyrwoh bala pynmih ha ka sngi Nyngkong, ka NESO kala ong “Ngi kwah ban pynkynmaw ia ki paidbah jong baroh kawei ka thain Statei Lam Mihngi ba ha ka 11 tarik Nohprah 2019, wat hapdeng ki jingpyrshah ba khlem sangeh jong ki paid riewlum ka Thain pyrshah ia ka Citizenship (Amendment) Bill 2019, ka Sorkar India kam shym la pynsangap bad khatduh lyngba ka Rajya Sabha, kala mynjur ia ka ain iakjakor bala tip kum ka Citizenship (Amendment) Act 2019. Ka NESO kala pynbna ba ka 11 tarik Nohprah kan iai sah ha ka jingkynmaw kum ka sngi ba dum ngit ia ka thain Shatei Lam Mihngi baroh kawei”.
“Kumta, kum ka jingpynbteng ia ka jingkynmaw ia kane ka sngi ba dumngit, ka NESO kala rai ba kan don ka jingpynher lama iong bad wah banner iong ha baroh ki jaka ba kongsan jong ki 7 tylli ki Jylla ha ka 11 tarik Nohprah 2024. Kane ka jingkynmaw ka long ban phah ia ka khubor sha ka Sorkar India ba ngi pyrshah ia kane ka Citizenship (Amendment) Act, 2019 bad ruh ha kajuh ka por ban pynkynmaw ia ki paidbah jong ngi bad ia kiba hadien jong ngi sa ia kawei pat ka jingleh bymhok jong ka Sorkar India pyrshah ia ki paid riewlum ka thain Shatei Lam Mihngi” kala ong.
Ha kajuh ka por, ka NESO kala khor ia baroh ki paidbah ka thain ba kin kyrshan ia kane ka jingkynmaw ia ka sngi ba dumngit bad ha kajuh ka por ban iai ialeh na ka bynta ka daw ba shonghok kaba long ka hok ba la ai da U Blei.
