Shillong, Nohprah 09 : Ka Sorkar Jylla kala pynbna ia ka sngi Ba-ar (10 tarik Nohprah) kum ka sngi shuti ia baroh ki skul ha Shillong namar ka jingdon jong ka Concert u Bryan Adams ha madan Polo.
Une Nongrwai ba pawnam na Canada, un sdang ia ka India Tour da ka concert ha Shillong lashai ka 10 tarik Nohprah. Kane ka concert kan long ha JN Stadium bad la khmih lynti ba kan khring ia ki phew phew hajar ngut ki riewieid jingrwai na kylleng ka Jylla bad ki Jylla ba marjan kum ka Assam, Nagalang, Arunachal Pradesh bad kiwei kiwei.
Hadien ka Shillong, u Bryan Adams un leit ban kiew sa ha ka rynsan iaput iatem ha Gurugram, Mumbai, Bengaluru bad Hyderabad.
Namar ka jingkhmih lynti ia ka jingwan tuid u paidbah ha sor Shillong, ka Directorate of School Education & Literacy, ula bthah ia baroh ki skul ba kin khang lashai ka sngi ba-ar. Ia kane ka rai la shim halor ka jingkyrpad na ka Tnad Jngohkai ka Jylla.
Kane ka tour u Bryan Adams kan pynshongshit da ki jingrwai ba pawnam jong u kynthup naduh ki jingrwai jongki album kiba rum bad ruh ka album ba dang pynmih thymmai ha u 2022 bala ai kyrteng “So Happy it Hurts”.
Ki jingrwai u Bryan Adams kim long thymmai shuh hangne ha Jylla bad ka thain Shatei Lam Mihngi ne ka ri India. Ula wan tem la katto katne sien ha India bad la pdiang sngewbha ia ki da ki phew hajar ki paidbah ha man ki concert. Ula wan tem khatduh eh ha u snem 2018 ha Mumbai bad Bengaluru kaba la dap smam da ki paidbah.
U Bryan Adams ula sdang ban pawnam ha ki snem 1980 bad katba nang iaid ki snem, ka kyrteng jong u, kala rung ha manla ki thliew iing lyngba ka jingrwai ba pawnam kum ka “Summer of ‘69”, “(Everything I Do) I Do It For Yoy” bad “Please Forgive Me”.
Ha baroh kine ki snem bala leit noh, ula ioh pdiang ruh ia shibun ki khusnam kynthup ia ka Grammy Award bad bun tylli ki Juno Awards.
