Shillong, Naitung 19: Ka skulbah North-Eastern Hill University (NEHU) kala pynbna ba kan pyntreikam noh iaka New Education Policy (NEP) 2020 naka bynta ki kyrdan pule Undergraduate naduh 1 tarik Nailar 2023.
Ia kane la pynbna da u Vice Chancellor (VC) ka NEHU u Prof. P.S Shukla uba la iathuh ba ka skulbah kala dep phah daki shithi sha baroh ki jaka pule kiba la iasoh ne hap haka jingkhmih jong ka NEHU.
Lah ban kdew ba ka National Education Policy 2020 (NEP 2020) ka dei ka Policy ban bujli iaka National Policy on Education, 1986 bad kane kan long kum shi bynta ban kyntiew iaka pule puthi hapoh ka ri India.
Lyngba ka NEP 2020, ka NEHU ruh kan pyntreikam iaka Four-Year Undergraduate Programme (FYUP) bad kan pdiang ruh iaki jingpyrnung thymmai ki samla pule daka ba pdiang iaka Certificate jong ki diploma bad ka Degree haba kut jong ka First, Second bad Third year.
Haba kren sha ki lad pathai khubor u Prof Shukla ula iathuh baka NEHU kala dep ban pyntreikam iaka NEP 2020 naka bynta ki kyrdan Post Graduate (PG) naka bynta u snem 2022-2023 bad naduh 1 tarik Nailar 2023, ka NEHU kan pyntreikam iaka NEP 2020 naka bynta ki kyrdan pule Under Graduate (UG).
“Haba iadei bad ka jingpyntreikam iaka NEP 2020 naka bynta ki kyrdan UG ha NEHU bad ha baroh ki jaka Pule kiba la iasoh lane kiba hap haka jingkhmih ka NEHU, naka liang ka skulkbah kala dei ban phah daki shithi ban pyntip ba yn sdang pyntreikam noh naduh 1 tarik Nailar 2023” la ong u Prof. Shukla.
U Prof. Shukla ula iathuh ba dang ha ki khyndait sngi ka NEHU kala lum ka jingialang bad ki nongialam bad ki Principal jong baroh ki jaka pule kiba hap haka jingkhmih jong ka NEHU bad kila pynpaw ba ki la long kiba pynkhreh ban pyntreikam noh iaka NEP 2020.
Haba kyll hato don em ki jaka pule lane College ki bym pat kot bor ban pyntreikam iaka NEP u VC ula ong “Haduh mynta ka skulbah kam pat ioh iaka jubab haba iadei bad ka shihti bala phah ban pyntreikam iaka NEP bad ki don katto katne ki College kiba pynpaw ka jingeh ban pyntreikam iaka NEP hynrei naka liang ka NEHU kala bthah iaki ban pyntip, balei kim lah ban pyntreikam khnang baka NEHU kan lah ban kner jingiarap sha kum kita ki College”.
U Prof. Shukla ula iathuh ba ha ki sngi ban wan kino kino ki Colleg ki bym kot bor ban pyntreikam iaka NEP kin phah shaka NEHU bad naka liang ka skulbah kan ialeh katba lah ban kner jingiarap khnang ban pynthikna ba ka jingpyntreikam iaka NEP 2020 ha Meghalaya ka long kaba seisoh bad ba iaid beit.
Lah ban kew bah aka 1 tarik mynta u bnai u myntri ka tnat Pule Puthi ka jylla u Rakkam A Sangma ula kubur ba ki don katto katne tylli ki jaka pule ne College ki bym kot bor ban pyntreikam iaka National Education Policy (NEP) 2020.
U Rakkam ula iathuh ban aka liang ka tnat pule kala lum ka jingialang bad ki nongialam ki jaka pule bad ki Principal bad kila pynpaw ba kim lah ban pyntreikam iaka NEP naduh 2023 hynrei kin pyrshang ban pyntreikam naduh 2024-2025.
 ka dei ka Policy ban bujli iaka National Policy on Education, 1986 bad kane kan long kum shi bynta ban kyntiew iaka pule puthi hapoh ka ri India.){kind=link}