Shillong Lber 29: Ka Election Committee jong ka Khasi Students’ Union (KSU), kala pynbna ba kan pynlong ia ka elekshon kaba XVI jong ka KSU ha ka 9 tarik u Jymmang ha Dinam Hall, Jaiaw.
Katkum ka kyrwoh na u Chairman, Election Committee u Bah Danny M. Khyriem bad u Secretary Bah Samuel B. Jyrwa kila pyntip ba ia ka Elekshon kaba XVI sha ka ophis treikam jong ka KSU na ka bynta ka samoi trei kam 2026-2029, kan long ha ka 9 tarik u Jymmang 2026 naduh ka por 8 baje mynstep haduh 3 baje janmiet.
Ka Committee ka khot ka wer ia baroh ki khun samla kiba la ih jong ka bri u hynniewtrep, khamtam na ka liang ki dkhot jong ki Unit bapher bapher ka KSU ba kin mih shakhmat ban iakit iabah lem ia ka lyngkor ba khia jong ka KSU naka bynta ka ri bad ka jaitbynriew, da kaba iashimbynta shitrhem kum ki kyrtong ha katei ka ilekshon.
Kila pynpaw ruh ba ia ki jingtip kiba bniah halor kane ka kam lah ban ioh na ka ophis treikam jongka KSU ha Jaiaw Chapel, Shillong.
Ia ki nomination paper yn sdang ban ai naduh ka 4 tarik u Iaiong haduh ka 11 tarik u Iaiong, 2026 naduh ka por 11 baje mynstep haduh 5 baje janmiet ha ka ophis jongka KSU.
Ki kyrtong kiba iakhun ia ka elekshon kidei ban pynpoi ia ki kot ki sla ne Nomination Paper naduh ka 6 tarik u Iaiong haduh ka 13 tarik u Iaiong haduh ka por 5 baje janmiet. Ka jingweng noh ia ka kyrteng ban iakhun ia ka elekshon kan long ha ka 14 tarik u Iaiong.
Ka jingbishar bniah ia ki kot ki sla jongki kyrtong kan long ha ka 15 tarik u Iaiong ha ka por 1 baje nohphai sngi. Ia ki nomination paper dei ban pynpoi ha lane shwa jong katei ka tarik ba la kdew haneng ha u Chairman ne Secretary jongka Election Committee.
Ka Election Committee ka bthah ia baroh ki unit, circle bad district unit ban pynpoi ia ki kyrteng jong ki nongjied kaba long 10 ngut na kawei kawei ka unit, circle bad district hapoh ka 11 tarik u Iaiong, 2026 ha ophis treikam jong ka Seng ha Jaiaw.
Ka Committee kala jied ruh ia ki katto katne ki nongialam barim, ki riew rangbah, ki nonghikai bad kumjuh ruh na ka liang ki lad pathai khubor ban long kum ki nongpeit pyrman ia ka jingiaid beit iaid ryntih jong kane ka Elekshon.
, kala pynbna ba kan pynlong ia ka elekshon kaba XVI jong ka KSU ha ka 9 tarik u Jymmang ha Dinam Hall, Jaiaw.){kind=link}