Guwahati, Naiwieng 28 : U Chief Executive Member (CEM) ka Karbi Anglong Autonomous Council, u Dr Tuliram Ronghang hynnin ka sngi U Blei ula pynbna ia u heh ka tnat forest u Bidyasing Lekthe kum u riewshlur jong ki Karbi, kata hadien ba ula shah pyniap na ka jingiaumsnam ba dang shen ha ka shnong Mukroh.
Hadien ba ula wan poi ha Guwahati hadien ka jingleit iashim bynta ha ka jingrakhe ia ka lyngkhuh sngi kha ba 400 jong u Bir Lachit Borphukan ha Delhi, utei u Chief Executive Member ula wan poi ha ka iingsah jong utei u heh ka tnat forest ba la shah pyniap ha Jaluk Langteng hapoh West Karbi Anglong district na ka bynta ban pynpaw ka jingsngewlem.
Ia u Ronghang la synran lang da u Myntri ka tnat Hill Development u Jogen Mohan ha kane ka jingleit jngoh.
Ha ka 22 tarik mynta u bnai ka jingiaumsnam kala khie kynsan hapoh ka shnong Mukroh hajan ka jaka khappud kaba don hapdeng ka jingiakynad hapoh ki ar jylla hapoh West Karbi Anglong district, kata hadien ba ia kawei ka trok ba la kynnoh kit dieng beain la lapdien da ki pulit forest guard napoh Assam.
Kham hadien shibun bah ki paidbah kila khynra ia ka kynhun ki pulit da kaba rah ryngkat ki tiar pynmynsaw hala ki jong ki kti, kumta na ka liang ki pulit ban iada ia lade la kynnoh ba kila ther kuli kaba la wanrah ia ka jingiap jong ki san ngut ki briew kaba kynthup ia u Lakethe.
Hadien kane ka jingjia, na ka liang u Myntri Rangbah (CM) ka Meghalaya u Conrad Sangma ula ujor pyrshah da kaba kam ba ki bor pulit bad ki forest guard jong ka Assam kila wan rung beain sha u pud u sam jong ka jylla na ka bynta ban ther kuli naphang ia ki paidbah.
Katba na ka liang ki heh sorkar ka Assam kila kynnoh ba ia katei ka trok la lapdien na West Karbi Anglong district ka Assam da ka kynhun ki forest guard, katba ki paidbah na Meghalaya kila thombor beit beit ia kine ki forest gurad kumjuh ia ki bor pulit ka Assam kiba ha ka jingpyrshang ban tehlakam ia ka jinglong jingman kila hap ban pyndonkam da u kuli.
