Agartala, Nailur 10 : Ha kawei pat ka jingkylla ha ki kam sain hima sima, ka sorkar synshar Bharatiya Janata Party kala jied ia u CM barim u Biplab Kumar Deb na ka bynta ban ia aireng ha ka ilekshon shiteng samoi na ka bynta kawei ka seat shapoh Rajya Sabha.
U Deb ula shim ia ki artylli ki jingkitkhlieh ha kajuh ka sngi.Ka jingpyntip ba la soi da u National General Secretary ka BJP, u Arun Singh kala pynbna paidbah halor kane ka jinglong jingman.Hadien ba la pynbna paidbah ia kane, u Deb khlem da pynslem ula ai khublei kyrpang ia u Myntri Rangbahduh (PM) Narendra Modi.
“Ka jingkhublei ia u PM Shri @narendramodi ,@BJP4, u President Shri @JPNadda & bad u Home Minister Shri @AmitShah halor ka jingjied ia nga kum u kyrtong ka BJP na ka bynta ka ilekshon Rajya Sabha MP na Tripura.Nga kut jingmut skhem ban trei na ka bynta ka bha ka miat bad ka roi ka par jong ka jylla Tripura bad ki briew jong ka,” thoh u Deb lyngba ka Twitter.
Une u CM barim ka Tripura un iakhun ha kane ka ilekshon pyrshah ia u Bhanu Lal Saha jong ka CPI(M).Kham hashwa u Deb ula shah thung kum u National Observer jong ka BJP na ka bynta ka jylla Haryana.
Ha kawei pat ka bynta, u observer ka central na ka bynta ka Tripura, u Vinod Sonkar ruh ula pyllait noh ia kane ka kam bad la aiti thymmai ha u Mahesh Sharma MP.Ka Ia ka ilekshon shiteng samoi na ka bynta ka Rajya Sabha la pynkhreh ban pynlong ha ka 22 tarik mynta u bnai.
