Shillong, Jymmang 09: U Myntri Rangbah ka Jylla Meghalaya u Conrad K Sangma hynne ka sngi Thohdieng, ula pyllait ia ka mar ba 1700 metric ton u synsar ban shalan na Khlieh Umsten Ribhoi district.
Ïa kane ka mar la shalan sha ka Central Warehousing Corporation ha Guwahati Assam naka bynta ban buh bad die lilam sha ki nongthieed synsar kiba thlieh dor ha heh tam.
Ia kane ka jingshalan u u synshar la leh hapoh ka CM-ASSURE kaba dei ka prokram jong ka Sorkar Jylla ban kyrshan ia ki nongrep ha ka jinghiar dor u synsar ha iew bad kane ka CM-ASSURE ka pynleit jingmut ha ki mar ki mata ki bym pyut bad kiba kham neh slem.
Ha kane ka sngi u Myntri Rangbah ka Jylla u la aiti ruh ia ki kali Pick-up sha ki nongioh jingmyntoi na ka CM-Elevate.
Haba kren ha kane ka sngi, u Myntri Rangbah u la pyntip ruh halor ki kam jong ka Sorkar ban kyntiew ia ka ka rep ka riang bad ka bha ka miat jong ki nongrep hapoh ka Jylla.
U Conrad u la pyntip ba ka Sorkar kala shim ia ki sienjam ban wanrah ia ka jinglong jingman kaban pynlah ia ka jingkiew ka rep ka riang bad ka jingpynmih ia kiwei pat ki mar na ki marrep.
U la kdew ba kawei na ki jingtynjuh ba ka Jylla ka iakynduh ka dei ka jingpynkiew ia ka jingpynmih ia ki marrep, kaba long kongsan bha naka bynta ban myntoi ki nongrep bad ka kam rep hapoh ka Jylla. Ula pynthikna ba ki kynhun bapher bapher kila iatreilang ban weng ia kane ka jingeh.
“Ka Sorkar kan ïatreilang bad ki nongrep, ki paidbah bad ki nongseng kam seng jam ban wanrah ïa ka jingkylla ha ka ïoh ka kot ha ki thaiñ nongkyndong lyngba ki rukom rep kiba bha tam” la ong u Conrad.
Ki sienjam baka Sorkar ka shim ban kyntiew iaka rep ka riang kum ka CM-ASSURE bad ka CM-Elevate, ki pyni ia ka jingshimkhia jong ka Sorkar ban kyrshan ia ki nongrep bad ban kyntiew ia ka jingpynmih marrep. Kine ki sienjam ki dei kiba thmu ban kyntiew ia ka ioh ka kot ki nongrep, pynkhraw ia ka kamai ka kajih, bad ban noh synniang sha ka jingroi ka ioh ka kot ka Jylla.
