Shillong, May 9: Ka Meghalaya kala ioh rung sha ka Semi Final jong ka Swami Vivekananda U-20 Men’s National Football Championship 2025 hadien ba kala pynrem ia ka Karnataka da 1-0 ha Narainpur, Chhattisgarh, hynne ka sngi Thohdieng.
Mar ia sdang ka jingiakhun jong ka Quarter Final, u Ricky Kharkongor ula thep ia ka kol ha ka minit kaba 4 na ka bynta ka Meghalaya. Ka Karnataka kala pyrshang kat kaba lah ban ioh pynphai kylla bad kala thaw ia ki katto katne ki kabu tangba kam shym la lah ban thep kol khamtam ha ka kylla miet, hynrei ki rangialehkai shadien jong ka Meghalaya kila iengskhem ban ym ailad ia ka Karnataka ban ioh thep kol.
U Coach ka Meghalaya u Bah Bobby L Nongbet ula wanrah tang kawei ka jingpynkylla da kaba wanrah ia u Banlamkupar Rynjah ha ka jaka jongu Nickyboy Swer.
Ka Meghalaya, kala ioh rung sha ka Quarter Final da kaba jop baroh 3 tylli ki jingiakhun ha ki jingiakhun ha ka Group A.
Ka Karnataka kala sdang ban ialehkai bha bad thaw ia ki kabu ban ioh thep kol hynrei kam shym la lah satia ban thep kol pat haduh ban da kut ka jingialehkai.
Ka Meghalaya kan iakhun ia ka nongjop ha ka Quarter Final kaban long hapdeng ka lahduh jong ka Group C ne Group D ha ka Semifinal. Ka jingiakhun ha ka Group C bad D kan long ha ka sngi u Blei bad ha ka Sngi Nyngkong.
