Shillong, Nailur 29: U Myntri Rangbah ka Jylla Meghalaya u Conrad K Sangma hynne ka sngi u la pyllait paidbah iaki kali ‘DFS Crime Scene Vehicles’ bala mang sha baroh 12 tylli ki District jong ka Jylla.
Ia kine ki kali yn pyndonkam da ka forensic unit jong ka tnat Meghalaya Police.
Ha kane ka sngi u Myntri Rangbah u la plie ruh ia ka ophis Anti-Terror Squad (ATS) jong ka Meghalaya Police.
U Myntri Rangbah ka Jylla ha ryngkat bad u Symbud Myntri Rangbah ba khmih iaka tnat kam pohïing (Police) u Bah Prestone Tynsong ki shong jingïalang bishar bniah ba shisien shisnem bad ki SPs bad COs ha Police Headquarter Shillong.
Ha kane ka jingialang la pynlait paidbah ia ka MEGPOL, kaba dei ka buit wadbniah ba kham jylliew na ka bynta ki pulit ka Jylla bad ka Personnel Information Management System (PIMS).
U Myntri Rangbah ka Jylla bad u Symbud Myntri Rangbah ki la pynkupburom ruh ia ki Pulit ka Jylla Meghalaya na ka bynta ka jingtrei shitom jong ki ban lap ïa ka mukotduma pynïap briew ha Sohra, kumjuh ruh ïa kiwei pat ki ophisar na ka bynta ka jingjop jong ki ban pynbeit ïa ki mukotduma hapoh ka por kaba lyngkot.
