Shillong, Naiwieng 28 : U Myntri Rangbah ka Jylla Conrad K Sangma ha ka sngi Balang, ula pyllait paidbah ia ka Community Public Private Partnership Program (CPPP) na ka bynta ka jingmyntoi jong ki Processing Unit kiba heh hapoh ka Jylla.
Haba ai jingkren, u Myntri Rangbah ula ban jur ba ka jingpyllait ia kane ka prokram ka dei ka sienjam ban wanrah jingkylla ha kaban kyntiew ia ka rukom im jong ki paid riewlum hapoh ka Jylla bad ban aikam aijam.
Ula kren ruh halor ka jingdonkam ban don ka jingiatreilang hapdeng ki kynhun bapher bapher kynthup ki Co-operative Society, ki Self Help Group bad ki riew shimet, ban kyntiew ia ka jingpynmih marrep bad ka kamai ka kajuh.
“Haba ngi iakren shaphang ki kynhun bapher bapher, la ki dei ki kynthei jongka Jylla bad ki ishu bapher bapher ba iadei bad ka koit ka khiah lane ki samla jong ka Jylla bad ki ishu bapher bapher naduh ka pule dangle bad ka jingailad ia ki ha ka kam ialehkai, ka put ka tem lane ki dei ki nongrep, ngi sngewthuh ba ka don shibun ka lad ban kyntiew ha baroh ki kynhun bapher bapher bad nalor ki skhim ba ju don lypa na ka Sorkar India bad katto katne ki skhim na ka Sorkar Jylla, ki don ruh ki prokram, policy bad ki buit treikam ban btin lynti ia ki shakhmat”.
U Conrad ula pyntip ba ki kynhun Integrated Village Co-operative Society (IVCS) bad ki nongrep bapher bapher kila ioh jingmyntoi bha ha kine ki khyndat snem lyngba ki prokram jong ka Sorkar bad ong ba ka Jylla kam shym la don ia ka lad ban pynmih bun jait ki mar ki mata kat kum ka jingdawa ka iew hynrei ka hap ban jied kyrpang ia ki mar kum u sying, shynrai, tit shitake bad kiwie kiwei. Ula pynpaw ia ka jingsngewhun halor ka jingiaid ki kam ban kyntiew ia ka rukom im jong ki nongrep bad ki cooperative society hynrei ula banjur ia ka jingdonkam ban iai pyrshang ban sei shuh shuh ia ki lad ki lynti ban kyntiew ia ka rep ka riang bad ka jingpynmih marbam lyngba ki processing unit.
Ka Sorkar Jylla kala tyrwa ban kynshew haduh T.106 klur lyngba ka CPPP prokram ha Jylla.
Ha kane ka sngi, u Myntri Rangbah ula aiti ruh ia ka cheque ba T.16 klur na ka bynta ka CPPP prokram bad T.2.55 klur kum ka bai seng ia ki Cooperative bapher bapher. Ula pyllait ruh ia ki Agri Response Vehicle kaba la thied na ka CM Elevate.
Kiba la iadonlang ha kane ka prokecm ki kynthup ia ka Myntri ka Koit ka Khiah Kong Ampareen Lyngdoh bad kiwei kiwei.
