Shillong, Iaiong 05 : Ka Liang Pyrshah Voice of the People Party (VPP) kala pyllait ia ka manifesto elekshon Lok Sabha ba 24 tylli ki mat, kaba pynleit jingmut ban iakhun ha kaban kynthup ia ka Meghalaya hapoh ka Article 371, ban iada ia ka Jylla na ka jingtreikam ki ain ka Sorkar Pdeng.
Kane ka manifesto ba 14 sla, la pyllait paidbah da u Vice President Dr Kara H Shen ha ryngkat kiwei ki nongialam ka Party ha ka jingiakynduh bad ki lad pathai khubor hynne ka sngi Thohdieng.
Ka VPP kala pynieng ia u General Secretary Dr Ricky AJ Syngkon kum u kyrtong ban iakhun ia ka elekshon Lok Sabha na Shillong Parliamentary seat.
Ka party ka pyntip ba kan iakhun lane buh ia ka Meghalaya hapoh ka Article 371 ban iada ia ka Jylla na ka jing treikam ki ain ka Sorkar Pdeng kiba ktah ia ka riti ka dustur jong ki paidbah.
Kala kular ruh ban tynruh ha kaban pynrung ia ka ktien Khasi ha ka khyrnit ba phra jong ka Riti Synshar ka Ri bad ruh ban kyntiew ia ka pule dangle ha Jylla nalor ban pyrshah ia ka jingpynjari ia ka ktien Hindi bad pynksan ia ka ktien English kum ka ktien ai jinghikai ha ki skul bad ki college nalor ka official language ka Jylla.
Ka VPP kala shim ruh ia ka nongrim kaba skhem pyrshah ia ka Uniform Civil Code bala wanrah da ka Sorkar BJP.
Haba pyrshah ia ka jingtreikam ka Citizenship Amendment Act (CAA) ha Meghalaya, ka VPP kala kular “Ban pynrung biang ia ka kyrteng ka Khasi bad Jaintia Hills ha ka preamble jong ka Bengal Eastern Frontier Regulation Act, 1873, namar la weng ia ka ha ka Adaptation of Laws (Amendment) Order, 2019”.
Haba ong em ia ka jingtih Uranium ha Meghalaya, ka VPP kala ong ruh “Ngi pyrshah ban wanrah ia ka lynti rel khamtam ha ri-lum Khasi bad Jaintia tad ynda la pyntreikam ia ki lad jingiada ban tem ia ka jingrung kythep ki bar jylla”.
Ha kajuh ka por, ka VPP kala kular ban shong bishar biang ia ka resolution iapynbeit khappud hapdeng ka Meghalaya bad Assam nalor ban phah tuklar ha ka Sorkar Pdeng ha kaban pynbeit ia ka jingiakajia pud ha Block-I bad Block-II.
Kala kren ruh halor ka jingdonkam ban wanrah ia ka jingtreikam kaba shai, kaba khuid bad ba treibha ha ka Sorkar ban pynthikna ba ki jingdonkam bad jingangnud ki paidbah kin urlong.
Kala kular ruh ban kyntiew ia ka tulop bad jingkyrshan ka Sorkar ia ki nongtrei ASHA, ban pynjanai ia ka rukom treikam ki Anganwadi Centre ha ka Jylla bad kyntiew ia ka jingim jong ki Nongtrei Anganwadi, ban pan ia ka jingkyrshan ka Sorkar Pdeng ban shna kham bun ki surok hapoh JJylla nalor ban iakren ha kaban pynkhlain ia ka digital technology hapoh ka Jylla.
Nalor kine, kane ka party kala kren ruh halor ka jingpynkynriah ia ki katto katne ki Ophis ka Sorkar Pdeng na ki jaka bala khapngiah jong ka Nongbah Shillong khnang ban lah pynduna ia ka jingdheng kali bad pynthikna ba ki kali kin iaid khlem ka jingwit.
