Shillong, Iaiong 05: Ka Voice of the People Party (VPP) hynne ka Sngi Thohdieng kala kynnoh ba ki Nongthaw aiñ na ki seng saiñ pyrthei bapher bapher ba kila kyrshan da kaba mynsiem tang dep rukom ia ka Resolution halor ka Inner Line Permit (ILP) haba mynjur hapoh ka ïing dorbar thawaiñ ka jylla.
Haba iakren bad ki nongthoh khubor, u Nongaiktien ka VPP Bah Batskhem Myrboh ula ong, ba ka seng ka burom iaka jingshemphang jong ka ïing dorbar thawaiñ ka jylla ban mynjur ia ka Resolution ba kyntu ia ka Sorkar Pdeng ban pyntreikam noh ia ka ILP ha Meghalaya.
“Hynrei haba peit ia ki dkhot jong ka ïingdorbar thawaiñ ka jylla kiba mynjur ia ka Resolution bad haba peit ia ka histori ia ka nongrim kaba ki ïeng halor ka ILP, ka pyni ba ka long da kumwei pat, ki dei kito ki briew, ia kaba nga hap ban ong, ki don jingmut da ka mynsiem tang dep rukom ia ka ILP” ong u Bah Batskhem.
Ula ong ba ka long kaei kaei ka bym sngewtynnad ba ka sorkar pdeng ym tang ba kam shym la ai ia ka ILP ia ka jylla Meghalaya hynrei kala weng noh shi syndon ia ka kyntien Khasi-Jaintia Hills District na ka ‘Preamble jong ka Regulation of 1873’ bad ula ong ba kane kadei ka jingbym larkam na ka liang jong ka Sorkar Jylla.
Ula ong ba ka VPP kala rai ban shimkhia tyngeh halor kane ka mat bad ka sorkar pdeng.
“Ngi ngin ym sangeh bad ngin pynbor ia ka sorkar pdeng” ong u Nongaiktien ka VPP.
