Shillong Kyllalyngkot 24: Ka Meghalaya TMC ha ka sngi baar kala pyllait paidbah ia ka Election Manifesto ryngkat badnki 10 tylli ki jingkular kiba kane ka seng kan leh ban kyntiew iaka jylla ha baroh ki liang lada ka wan ha ka bor.
Ia katei ka Manifesto bad ki jingkular la pyllait paidbah da u National General Secretary ka TMC u Abhishek Banerjee ryngkat ka jingdonlang u President ka Meghalaya TMC u Bah Charles Pyngrope, u Nongialam ka Liang Pyrshah u Dr Mukul Sangma, u MP ka Rajya Sabha u Derel OBrien bad kiwei kiwei.
Ki 10 tylli ki jingkular ka TMC kaba kan leh mardor lada ka wan ha ka bor ka long ban kyntiew iaka GDP jong ka jylla bad ban pynlong iaka Meghalaya kaba lait na ka jingduk bad ban sdang noh iaka jingtih ia u dewiong lyngba ka Scientific Mining bad ban don iaka Mining Policy ba kan ym ktah iaka jakpoh jong kano kano ka longiing.
Nalor kane, ban ai kam 3 lak ngut ha ki 5 snem bad ban ai iaka Allowance kaba T.1000 ia ki samla khlem kam khlem jam naduh ka rta 21 haduh 40 snem lyngba ka Meghalaya Youth Empowerment Card bad yn ai Job Card ia kito kiba don bynta ha ka kam jngohkai ha kaba kin ioh pdiang T.2500 man la ka bnai.
Ka TMC kan ai T.1000 man la ka bnai ia ki kynthei kata T.12000 ha ka shisnem lyngba ka Women Empowerment Scheme ban kyntiew sa 25 percent iaka Grant ha ka koit ka khiah, pule puthi, jingiarap haba don ba iap, ka jingai jingkyrshan ia kiba shongkurim bad ka jingai penshon ia ki nongtrei kiba don jingduna ha ki dkhot met lyngba ka Meghalaya Building and Construction Workers Welfare Board.
Ka TMC ka kular ruh ba kan ai jingiarap T.10,000 man la u snem ia ki nongrep ha ka jylla lyngba ka FARM Scheme ban ai ka ERation Card ia baroh ki nongshong shnong ha kaba yn phah survey biang ban kyntiew ia ki paidbah kiba dei ban ioh iaka rashon.
U Abhishek ula ong, lada ka TMC ka wan ha ka bor kan pynduh py dam noh iaka MOU kaba la ia soi da ka Meghalaya bad Assam ha ka jingpynbeit ia u pud u sam.
Ula ong, ka TMC kan rah ruh da ka Private Member Bill ha Parliament ban dawa ban ai jingithuh noh iaka ktien Khasi bad Garo ha ka Eight Schedule jong ka riti synshar ka ri bad ka TMC kan pytreikam mardor iaka Meghakaya Residents Safety and security Act 2016.
Nalor kane ka TMC kala kular ruh ban kyntiew ia ka kam ialehkai bad khamtam ban kyntiew iaka sap ka phong jong ki nongialehkai, ban kyntiew iaki jaka pule, ki jala ai jingsumar bad kiwei kiwei.
