Shillong Nailur 01: U Myntri ka Tnad Pule Puthi ma Lahkmen Rymbui, u la pyntip, ba ka sorkar pdeng ha ka 17 tarik u Nailar, kala dep ban pyllait ia ka song pisa kaba T.272.34 Klur na ka bynta ban siew iaka tulop jong ki nonghikai Sarva Shiksha Abhiyan SSA kiba don ha ka jylla.
“Ka sorkar pdeng kala dep ban pyllait iaka pisa T.272.34 Klur (recurring bad non-recurring) naka bynta ki nonghikai SSA, hynrei haduh mynta ngim pat ioh ia katei ka pisa. Ngi khmih lynti ba mynta ka taiew ne ha ka taiew ban wan, ngin ioh noh ia katei ka pisa khnang ba ngin ioh ban siew noh iaka tulop jong ki nonghikai” la ong u Bah Rymbui.
U Myntri u la ong, lyngba katei ka pisa la khmih lynti ba yn lah ban siew tulop ia ki nonghikai SSA naka bynta 6 bnai.
Kumban shu pynkynmaw ha u Naitung mynta u snem, ki nonghikai SSA hapoh ka lama ka Meghalaya SSA Schools Association (MSSASA) kila pynlong iaka jingiakhih da kaba sahmiet bad shong kyllain mungor hajan ka Additional Secretariat, Shillong ban dawa iala ka hok, halor ka jingbym pyllait ka sorkar iaka tulop kaba 5 bnai ka jongki bad kila dawa ruh naka sorkar ba kadei ban kyntiew noh ia ka tulop jong ki nonghikai SSA, ban mang kham bun tyngka ban pyntreikam iaka skhim SSA bad kumjuh ruh ban ithuh noh ia ki kum ki nonghikai jong ka sorkar jylla.
Ki nongialam ka MSSASA ha ka 21 tarik u Naitung kila leit iakynduh ia u Symbud Myntri Rangbah ka jylla u Bah Prestone Tynsong bad kila ioh iaka jingkular da ka jingthoh na ka sorkar jylla ban pyllait noh iaka tulop kaba 4 bnai ka jongki bad ia ka tulop kaba dang sah sa shi bnai yn sa pyllait tang shu ioh iaka pisa na ka sorkar pdeng.
Ka sorkar jylla kala ai ruh, da ka jingthoh ba kan thung da ka Education Commission ban khmih bniah iaka jingdawa kyntiew tulop jong ki nonghikai SSA bad kumta ka MSSASA kala shim ia ka rai ban pynsangeh shwa iaka jingiakhih ka jongki.
