Pyllait ka Sorkar ia ka CM-RCS scheme | 90 tylli ki bos ban kamai sha ki District Headquarter bad ki Block

Shillong Jylliew 13: Ka Sorkar Jylla kala ai jingmynjur ban pyllait paidbah ia ka Chief Minister Regional Connectivity Scheme 2025 (CM-RCS) ban pyniasoh ia baroh ki District, Block bad ki Headquarter bapher bapher da ka jingai jingshakri lyngba ki bos.

Da kaba kam ba kane kadei ka sienjam kaba kongsan kaba la shim da ka sorkar jylla, u Nongaiktien ka Sorkar MDA u Bah Paul Lyngdoh uba long ruh u Myntri Sorkar ula ong, ka kynhun myntri kala mynjur ban sdang pyntreikam noh ia kane ka scheme.

“Kin don baroh 90 tylli ki bos ki ban ai nyngkong ia ka jingshakri bad ka jingthmu ka long ban pynshlur ia ki nongsengkam lajong bad kawei na ki bynta kiba kongsan jong ka scheme ka long ban pynthikna ba kine ki bos kin poi sha kylleng ki district headquarter hapoh ka por 9.30 mynstep bad ban mih ha ka por 5.30 janmiet ban pynbiang ia ka leit ka wan jong kito kiba leit ophis, ki samla pule, ki briew kiba leit sha ki hospital bad ki briew kiba leit iew leit hat” ula ong.

Ula pyntip ba ka jingai jingiarap pisa kan long haduh 50% na ka jinglut jingsep baroh ha ka jingthied ia ka bos.

“Kan don ka jingnoh synniang na ka sorkar kaba long 35% na ka bynta ka jinglut ha ka ‘On Road’ kum ka ‘Down Payment’. U nongioh jingmyntoi yn noh synniang 5% ia ka Down Payment bad ka jingshim ia ka ram kan long 60% ia kaba lah ban siew haduh 5 snem da ki nongioh jingmyntoi” ong u Bah Paul Lyngdoh.

Katkum ka jingong ka jongu, ka sorkar kala dep ruh ban ithuh ia ki lynti iaid kaban poi ha kylleng ki Block Headquarter, District Headquarter bad Regional Headquarter.
“Kane kadei ka sienjam kaba khraw bha kaba ngi sngewskhem ba kan weng ia ki jingduna ba ngi don mynta bad kan pynkhlain ia ki lad pyniasoh ha kylleng ka thain” bynrap u Bah Paul.

U Myntri ula banjur ba ka scheme kan iarap ha kaban pynshlur ban pyndonkam ia ka jingshakri jong ki bos ha kaba kan don ruh ka jingktah ia ka jinglong jingman baroh halor ka jingdheng kali ha ki surok.

“Ba kadei na katei ka jingshem kaba ka sorkar kam shym la don ia kano kano ka jingiadei hynrei lyngba ka jingshem lyngba ka jingpyniaid ka MTC ia ki bos bad kila kylla long ki jingduhnong tang hapoh katto katne por. Ngi mynta ngi la ioh jinghikai ban long kiba shemphang ban pynshlur ia ki nongseng kam kiba dei ki riewshimet. Kidei kiba biang bha bad kiba trei shitom bad ka rukom siew ka jongki ruh ka long kaba kham biang shuh shuh”.