Shillong, Jylliew 13 : Ka kynhun Myntri ka Sorkar Jylla ha ka sngi Thohdieng, kala ai jingmynjur iaka jingtyrwa ban aiwai 60 snem ia ka jaka ba 273.41 acre jong ka MeECL sha ka Tnad Tourism ba kan pyntrei ia ki project kam jngohkai bapher bapher.
Haba iakren bad ki lad pathai khubor hadien ka jingialang, u Myntri kam Jngohkai Bah Paul Lyngdoh ula ong “Nga sngewkmen eh ban pyntip sha phi ba khang ban pynmih pisa na ki jaka ba shu ieh shrah jong ka MeECL bad ki shnat jong ka, bad ruh ban pyntreikam ia ki project kam jngohkai da kaba shu wai jaka bad iasam ia ka jingiohnong, ka Kynhun Myntri mynta ka sngi kala mynjur ia ka jing tyrwa hakaba ka Tnad Bording lyngba ka MeECL, kala rai ban aiwai ia ka jaka ba 273.41 care sha ka Tnad Tourism”.
Kat kum ka jingong jongu, kine ki jaka ki kynthup ia ka IB campus, ka jaka na Le-Junction ha shi lynter ka Dyke, Umiam, Ri Shad Sngi haduh Nongsder, Police Station bad baroh ki jaka ha lyndet ka skul MeECL, ka jaka ha lyndet ka NHRDC haduh NESAC, ka thain Block-V haduh dewlynnoang Lum Pongdeng.
“Ka jingaiti ia ka jaka na ka Tnad Bording sha ka Tnad Tourism kan long kat kum ka policy ka Sorkar Jylla, ka ban long nyngkong da 60 snem ka jingaiwai kaba lah ban pynjlan biang sa 30 snem” ula bynrap.
Haba kylli, u Myntri ula iathuh “Ka Tnad kan siew T.1 ha ka shi acre hynrei ka bhah jong ka Tnad Bording kan long 90% kum ka baiwai na ka bynta ki 60 snem ba nyngkong, kaba lah ban pynjlan da 30 snem”.
Ula ong ba kane ka jingtyrwa ka long eh ban nang kyntiew kyrdan ia ka kam jngohkai hapoh ka Jylla.
Ka Sorkar kan wanrah sa 5 tylli ki Five Star Hotel, ka jingwanrah ia ka Lake Cruise Services ha kine ki shisnem ban wan.
