Shillong, Nailur 13: Ka President jong ka India ka Droupadi Murmu hynne ka sngi ka la plie ia ka Ayushman Bhav Campaign lyngba ka kor internet na Raj Bhavan, Gandhinagar.
Haba ai jingkren, ka President ka la ong ba ka thong jong ka ‘Ayushman Bhav Campaign’ ka long ba ym dei ban don mano mano ba shah ieh shadien bad ym dei ban don kino kino ki shnong kiba shah iehdien- yn pynlong ia ka ri jong ngi kaba jop ha ka jingkot sha ka thong ba baroh ki briew ki ioh ia ki lad jingsumar.
Ka la bynrap ba lada man u briew bad man ka longing ki long kiba koit ba khiah, kumta yn lah ban pynurlong ia ka jingkut jingmut ban tei ia ka India kaba koit ba khiah. Ka la sngewkmen ia ka jingpdiang ia ka rukom treikam kaba don bynta bad ki tnat sorkar bapher bapher ban kot sha kane ka thong. Ka la ong ba ka jingiatreilang jong baroh kan iarap ban kot sha kum kine ki thong kiba heh.
Ka President ka la ong ba ka jingai ia ki Ayushman card sha baroh kiba dei ban ioh jingmyntoi; ka jingpynlong ia ki jingialang Ayushman ban ai jinghikai ia ki nongshong shnong ha ki jaka nongkyndong shaphang ka koit ka khiah, ka jingleh khuid bad ka bam kaba tei; ka jingpynlong ia ki Ayushman Mela; bad ka jingleit ki doctor ha ki Community Health Center shisien shi taiew hapoh ka sienjam Ayushman Apke Dwar 3.0, ki long ki sienjam kiba dei ban ai jingiaroh.
Ka President ka la ong ba ka India ka iaid shaphrang da ka mynsiem shitrhem ban pdiang ia ka teknoloji kaba thymmai bad ki rukom treikam ha bun ki bynta. Ka la dap da ka jingsngewkmen ban kdew ba la plie ia ka ‘Ayushman Bharat Digital Mission’ ha u bnai Nailur 2021. Ka la pynpaw ka jingngeit skhem ba ka India kan long ka nuksa jong ka jingkynthup ia ki lad digital ha ki kam ai jingsumar kumjuh ruh ha kiwei kiwei ki kam.
Ka Ayushman Bhav Campaign kadei kaba la sdang da ka Tnat ka koit ka khiah jong ka Sorkar pdeng kadei ka sienjam ha kylleng ka ri na ka bynta ka koit ka khiah kaba thmu ban pynpoi sha baroh ki jaka ia ki lad ai jingsumar ha kaba yn poi sha baroh ki shnong bad ki nongbah ha ka ri. Ia kane ka Campaign yn pyntreikam ha ka Seva Pakhwada naduh ka 17 tarik Nailur haduh 2 tarik Risaw, 2023.
