Shillong, Risaw 03 : Ka National Peoples’ Farmers Front (NPFF) kala pyllait paidbah ia ka Online Registration Membership Form (OMRF)-ban plie lynti ia ki Nongrep ba kin ioh long dkhot hapoh ka Kynhun ba kin ioh ia shibun ki jingmyntoi ki ban kyntiew ia ka kam rep kam riang.
Ia kane ka OMRF la pyllait paidbah da u Myntri ka Tnad rep Timothy D Shira ha ka jingialang jong ka NPFF State Executive Committee, kaba la pynlong ha Canference Hall ka Ophis treikam ka NPP, ha Bivar Road, Polo Hills.
Kane kadei ka sien ba nyngkongeh ba ki President ka NPFF na man la ka district kin ioh ia kynduh markhmat bad u Myntri sorkar bad ruh ban ioh ban pynsngew sha u halor ka jingeh ba ki paidbah nongrep na man la ki District ki shem bad ia kynduh jingeh.
Ki District President ka NPFF kiba la poi sha kane ka jingialang ki kynthup naduh na ri lum Garo, Khasi bad ruh na ri lum Jaintia.
Haba kren kum u kongsan u Timothy D Shira u la pynpaw ia ka jingsngewnguh ba khraw ba u la ioh ia ka lad ban ia kynduh markhmat bad ki nongkitkam jong ka NPFF kiba la wan na kylleng ki District jong ka jylla Meghalaya.
“Kum u Myntri Sorkar, Nga tip bha ia ki mat bad ki jingeh jong ki nongrep bad ka tnad ka rep ka riang kadei kaba kongsan bha k aba hap khmih ia ka jingeh bad ki jingdonkam jong ki paid Nongrep” ong u Timothy.
U Timothy u la ong ba wat lada mynta u la dei u myntri hynrei ula long teng ruh u nongrep bad u don ka jingtip ba bniah bha ha kaba iadei bad ka kam rep kam riang, haba la pynpaw ka jingbynniaw halor ka jingiap tram jong u kwai bad kiwei kiwei ki marrep.
U la kyntu ia ki District President bad ruh ia ki nongkit kam ha ki Block bapher bapher ba kin leit sha ki paidbah nongrep ne ki grassroots ba kin pynshai bad pynsngewthuh ha kaba iadei bad ka rep ka riang bad u la kyntu ruh ia ki ban pynsngewthuh ia ki paidbah nongrep ban pynrung kyrteng ia lade sha ka NPP farmers front .
Na ka liang u Chairman ka NPFF Bah Himalaya M Shangpliang u la ong ba ki nongkitkam ka NPFF naduh ki District President bad ki nongialam na ki Block ki long kiba donbok ba kin ioh iakynduh ia u myntri sorkar ba peit ia ka tnad ka rep ka riang namar ba u dei uba la shemphang bha ha ka kam rep.
Halor ka jingthaw ia ka NPFF, u Bah Shangpliang u la ai khublei ia u State President jong ka National People Party u Bah Prestone bad kumjuh ruh ia u Conrad K Sangma uba dei u National President, kiba la ai mynsiem ban iaid sha khmat ban pyniar ia ka rukom trei kam jong ka NPFF.
Shuh shuh u Bah Shangpliang u la ong, Hapoh ka jylla Meghalaya dei tang ka NPP kaba don la ka jong ka shnat trei kam ka ban peit kyrpang ia ki nongrep, katba kiwei kiwei ki seng sain pyrthei kim ju don.
Ha kaba iadei bad kane ka Online Registration Membership Form u Bah Shangpliang u la iathuh ba ki nongrep kiban pynrung ia lade sha ka front kin dei kiba la tikna bad kiba dei hok.
Kumba long mynta napdeng ki 60 tylli ki Constituency, ka NPFF ka lah dep ban thaw ia ki District Committee kumba 36 tylli ki constituency katba satang 24 tylli ki dang sah ia kaba yn pyndep noh ia kine kiba sah hapoh mynta u bnai Risaw.
 kala pyllait paidbah ia ka Online Registration Membership Form (OMRF)-ban plie lynti ia ki Nongrep ba kin ioh long dkhot hapoh ka Kynhun ba kin ioh ia shibun ki jingmyntoi ki ban kyntiew ia ka kam rep kam riang.){kind=link}