Guwahati, Risaw 3: U Shyamkanu Mahanta, u nong shah kynnoh ba hakhmat eh halor ka jingkhlad noh u nongrwai ba pawnam u Zubeen Garg, u la leit ban tied jingkhang ha Supreme Court tang khyndiat sngi ha shwa ba un shah kem noh.
Ha ka 30 tarik u bnai Nailur, u Mahanta u la mudui da ka dorkhas (petition) na Singapore lyngba u nongsaid ain jong u, u Raj Kamal, ha kaba u la jer kyrteng ia ka sorkar India, ka sorkar Assam, u DGP Assam, ka CBI, bad ka NIA kum ki nongshah mudui. Ka jingkyrpad ka la pan jingiada na ka jingshah kem, da kaba kynthoh ba la pynngat thok ia u.
Ha ka petition, u Mahanta u la kam ba ki digital platform ki la pynmih ïa ka “jingïathuhkhana lamler” kaba pynïadei ïa u bad ka jingïap jong u Garg, watla ka bynta jong u ha Singapore ka long tang ha kaba pynlong ïa ka cultural festival. U la pynpaw ruh ba u la ïakynduh khatduh ïa une u nongrwai ar sngi shwa katei ka jingjia.
Ka dorkhas ka la kynnoh shuh shuh ba u la shah pynshitom beiñ hadien ka jingkhlad jong u Garg—palat 54 tylli ki ejahar (FIR) ba la ujor ha kylleng ka Assam bad ki jylla ba marjan, ki jingkhynra bunsien ha ka ïing sah jong u ha Guwahati, ki jingshah khang ki bank account, bad ki jingbyrngem ïa ka jingim lyngba ki social media bad emails da ki kyntien kiba ong, “Wan sha iing ngin thang im ia me” bad “Lada me wan sha Assam, ngin pyniap beit ia me.”
Ha ka shi tarik u Risaw, u Mahantakem noh ha ki pulit Assam hadien ba u la hiar ha New Delhi, kaba la pynkylla ïa jingpynlait shwa ban shah kem sha ka jingbishar kaba man ka por ha khmat ki ïingbishar ka lower court.
Ki jingkynthoh ha ka sain pyrthei ki la dep mih.Haba kynthoh ha ka X, ka BJP Assam Pradesh ka la thoh: “Uwei na ki nongshah kynnoh ba hakhmat eh ha ka jingïap jong u #BelovedZubeen u la thung ïa u nongshim kabu ka congress kum u nongïasaid aiñ jong u”.
Ha ryngkat bad u Mahanta, ka Special Investigation Team (SIT) kala kem ruh ia u Siddhartha Sharma, u manager jong u Garg, na Rajasthan. Baroh ar ngut u Mahanta, u chief organiser ka Northeast Festival, bad ia u Sharma la pynngat hapoh ka Sections 61(2), 105, and 106(1) of the Bharatiya Nyaya Sanhita (BNS), 2023, ha kaba iadei bad kane ka case.
Ka jingtohkit halor ka jingïap khlem por u Zubeen Garg ka dang ïaid shakhmat, ha kaba ki bor ba dei peit ki dang tohkit ïa kiba bun ki briew kiba la kynnoh ba ki don jingïadei bad ki jingjia kiba la jia ha katei ka jingjia ba sngewsih. La dep ban kem saw ngut ki briew.
