Shillong, Jylliew 27 : U Myntri Rangbah ka Jylla Conrad K Sangma, hynne ka sngi Palei, ula pyllait paidbah ia ka Chief Minister’s Research Grant (CMRG) ban pynshlur bad kyntiew ia ki kam wadbniah (Research) hapoh ka Jylla.
Ia ka CMRG la pyllait ha ka jingialang kaba long ha Meghalaya Secretariat ha ka jingiadonlang u Myntri ka Tnad Arts & Culture ka Jylla Bah Paul Lyngdoh bad kiwei kiwei.
Ka jingthmu jong ka CMRG ka long ban pynshlur ia ki kam wadbniah ha ki lain bapher bapher ba kynthup ia ka Arts & Culture, ki Jaidbynriew riewlum trai Jylla, ka Ktien ka Thylliej, ka jinghiar pateng, ki jingtei sahnam uba rim bad kiwei kiwei. Man kawei pa kawei ka project kin ioh ia ka song pisa ba T. 3 lak ban pyndep hapoh ka 10 bnai.
Ka aplikeshon bad ki kam ban jied
Ia ki aplikeshon ban ioh ia ka grant yn pynkut ha ka shiteng miet jong ka 20 tarik Naitung, 2024. Ki scholar kiba shah jied kin sa iohktien hapoh ka taiew ba-ar jong u Nailar, 2024, bad ia ka instalment ba nyngkong jong ka grant yn pyllait ha ka 15 tarik Nailar 2024. Ki scholar kiba kwah ban aplai ki lah ban phah ia ki kyrteng online lyngba ka website ka Sorkar, ka Tnad Arts & Culture bad ka Tnad Social Media Handles.
Ka rukom jied ka kynthup ia ka jingbishar bniah da ka CMRG Committee, bud da ka personal interview ka ban long ha Shillong. Ki kyrtong ba shah jied ki dei ban pyni bad batai ia ki rukom leh ia ka jingwadbniah. Ia ka thup jong ki kyrtong ba shah jied yn sa pynmih online.
Ka jingpyllait ia ka Grant bad ki kyndon
Ia ka grant yn pyllait ha ki lai bynta. Ka bynta ba nyngkong (50%) yn pyllait hadien ba pyndep lut ia ki jngdonkam baroh kiba donkam. Ia ka bynta kaba ar (25%) yn ai hadien ba kila aiti ia ka progress report kaba bniah hadien hynniew bnai. Ka bynta kaba lai (25%) yn pyllait hadien bala aiti ia ka Executive Summary, Final Report bad ka Final Statement of Account. Ka jingbym lah ban aiti ia kine ki kot ki sla hapoh ka por bala buh kan donkam ia ki kyrtong ba kin pynphai noh ia baroh ka grant.
Ka Final Research Project kan dei ka nongkynti jong ka Sorkar Meghalaya ha ryngkat ka jingai jingithuh ba ki ioh jingkyrshan na ka CMRG. Ki kyrtong ba shah jied la pynshlur ruh ba kin pynmih ia ki Research jong ki ha ka UGC Care List Journals da ka jingai jingmynjur.
Haba kren haba pyllait ia ka CMRG, u Myntri Rangbah Conrad K Sangma ula ban jur ia ka jingkongsan ki jingwad bniah bad jingbuh jingthoh. Ula ong “Ngi don ka jingsngew ba ngi duna bha ka jingbuh jingthoh bad ka jingwadbniah. Ka jingwad bniah ba da leh thikna bad ka jingbuh jingthoh ki dei ki mawbyrsiew ia kiba bun ki kam pynroi. Kane ka sienjam ka thmu ban kyrshan ia ki scholar bad ki nongwadbniah kiba angnud ban synniang hynrei ki bym don ia ki nongkyrshan”.
Ula bynrap “Ngi iohi ba kane ka jingwad bniah kan dei ka jingai pateng ia ka jingnang jingtip ka ban ai jingmyntoi ia ki pateng ki ban wan. Ka jingthmu jong ngi ka long ban nang pynheh ia kane ka prokram katba nang iaid ka por. Ngi kwah ban sdang da kaba rit, shemphang na ki bad sa nang pynheh”.
U Myntri Rangbah ula kyntu ia ki Scholar ba kin aplai ia kane ka grant bad ong “Kane ka prokram ka dei kaba mang ia phi. Lada phim aplai, kan shu sepei kai noh. Ngi long kiba kloi ban nang pynheh ia ka song pisa lada donkam. Nga ai khublei ia baroh kiba don bynta ha kaban pynlong ia ka jingpyllait ia kane ka prokram kaba jop bad nga phaikhmat ban iohi ia ki jingmyntoi ki ban wan hapoh ka Jylla jong ngi”.
 ban pynshlur bad kyntiew ia ki kam wadbniah (Research) hapoh ka Jylla.){kind=link}