Nongpoh, Naiwieng 10: Ka jingthmu jong ka Joint Action Committee (JAC) ban pynlong ia ka Jingialang paidbah ban pyrshah ia ka tamasa Cherry Blossom kaba la buh ban pynkut ha ka sngi U Blei kala pulom namar ka jingbym ailad ki bor pyniaid shnong ka Lumdaitkhla.
Lah ban kdew, ba ka JAC kala pyrshah jur ia ka jingpynlong ia ka tamasa Cherry Blossom ha ka sngi U Blei kata ha ka 19 tarik mynta u bnai, kaba dei ka sngi kut.
Ka JAC kala pynbna ban pynlong ia ka jingialang paidbah hynne ka sngi Palei ha Iew Bhoirymbong ban pynshai ia ki paidbah halor ka jingpyrshah.
Ki Nongialam ka JAC kila iapoi lang khrui ha kane ka Iew kaba la syrtap da ki bor Pulit bad ki Heh Pulit kiba la pahara banna kano kano ka jingjia kaba sngewsih, kiba la khang pyrshah ban pynlong ia ka jingialang namar ka jingbym ioh jingbit na ki bor Shnong.
Ki nongialam ka JAC, ki la pynpaw kane ka jingialang paidbah ka dei kaba la pynlong da ka jingthmu ban pynshai ia ki paidbah halor ka nongrim ba ki pyrshah ia ka jingpynkut ia ka tamasa ha ka sngi U Blei, hynrei kane ka jingthmu kam shem la urlong namar ba kim shem la ioh ia ka jingbit ban pyniaid ia kane ka jingialang na ki bor pyniaid shnong.
Dei halor kane, ka JAC ruh da kaba burom lang ia ka rai jong ki nongpyniaid shnong, ki la rai ban pynsangeh noh shwa ia ka jingialang bad ba kin sa shong pyrkhat pat da kiwei ki lad ki lynti ban pynshai paidbah.
