Shillong, Lber 25 : U Myntri Rangbah ka Jylla Conrad K Sangma ha ka sngi Ba-ar, u la ban jur halor ka jingshimkhia jong ka Sorkar Jylla ban kyntiew ïa ka kam seng kam seng jam lajong bad ka jingpynmih ïa ki buit treikam ba thymmai.
Kat kum ka jingong jong u, ka sorkar ka la shim ïa ki lad ki lynti bapher bapher na ka bynta ka roi ka par jong ka jylla kynthup ïa ki samla lyngba ka PRIME Meghalaya, ka CM-ELEVATE, ka Meghalaya Grassroots Music Project (MGMP), ka Skills Meghalaya bad kiwei kiwei.
“Ngi dang pynkha ia ki kam bad ki lad ki lynti, hynrei nga donkam ia phi ki nongseng kam seng jam, ba mynta phin wanrah lang ia kine baroh bad thaw ia ki lad ki lad ban kamai”, ong u Sangma.
U Myntri Rangbah u la kren ia kane ha ka Onboarding & Graduation Program ba la pynlong da ka PRIME Meghalaya hapoh ka phang ‘Launching Dreams, Celebration Growth’ ban pynkup burom ïa ki 75 tylli ki Startups ba hakhmat eh (ki nongsengkam thymmai ba hakhmat eh) kiba la shah jied lyngba ka Chief Minister’s E-Champion Challenge 5.0, kaba long ka jingsdang jong ka jingïaid lynti jong ki. Ha kane ka jingïalang la rakhe ruh ïa ka jingpynkut ïa ka Cohort 4, da kaba ithuh ïa ka jingaiti bad ki jingjop jong ki.
Halor ka thong ba kham heh jong ka PRIME bad ka jingkular jong ka sorkar ha ka kam seng kam seng jam, u Sangma u la kyntu ruh ïa ka kynhun ban thaw ïa ka tnat pisa na ka bynta ki nongseng kam seng jam bad ban pynïasoh ïa ki nongbei tyngka kiba lah ban wan na ka bynta ki nongseng kam seng jam.
U la ai khublei ia ki nongseng kam seng jam ba kin iai pynbor ia kiei kiei kiba khraw bad ban ai mynsiem ia kiba bun ki briew.
ka Chief Minister’s E-Championship Challenge, kaba la sdang da ka Sorkar Meghalaya ha u snem 2019, ka dei kawei na ki flagship program kaba thmu ban ithuh, ban pynheh pynsan bad ban kyrshan ïa ki nongseng kam seng jam kiba don jingkyrmen ha ka jylla.
Haduh mynta palat 6000 ngut ki nongseng kam seng jam ki la ioh jingmyntoi na ka prokram PRIME, palat 200 ngut ki nongseng kam seng jam kiba la mih bad palat 100 ngut ki PRIME Rural Fellows (PRF) kila ioh ia ka jingkyrshan.
Kiwei kiba la ai jingkren ha kane ka sngi ki kynthup ia u Gaurav Kapoor, CBO, IIMCIP, Aiban Swer, Director, MBDA, Cyril V.D. Diengdoh, IAS, Commissioner & Secretary bad Director, Tourism Department bad kiwei kiwei.
Ha kane ka sngi la pyllait ruh ia ka Acceleration Program, Product Catalogue Book, Annual Report bad PRIME Entrepreneurs Spotlight,da u Myntri Rangbah ka Jylla nalor ka jingiasam jingtip ia ki jingshem da ka EriWeave jong ka PRIME Cohort 2 bad Boba Bae ka Cohort 4.
