Nongpoh, Naiwieng 30: Watla ki jingujor kila mih ba kyntur pud bad shna surok beain ka Assam ha Bakhlapara kaba hap hapoh ka Hima Nongspung, hynrei ka Sorkar Assam kam shym la pynsngap satia bad la kynnoh ba mynta lei kala pom naphang sa ia ki dieng ki siej ban pyniaid lynti ia ka surok ha kane ka thain khappud ka Hima Nongspung.
Kane ka jingnang kyntur pud bad jingpom pathar ia ki dieng ki siej, la pyntip da ka seng Khasi Students Union (KSU)-Nongspung Circle kaba la leit iakynduh bad ujor markhmat ha u Addl Deputy Commissioner ka Ri-Bhoi District Raja Brahma hynne ka sngi Palei.
Ia kane ka kynhun ka KSU-Nongspung la ialam da u President ka KSU Western Border Area samla receive Pator bad u President ka KSU-Nongspung Circle samla Emos John Syiemlieh.
Haba iakren bad ki nongthoh khubor hadien ka jingai dorkhas, u samla Receive Pator ula iathuh ba u Syiem ka Hima Nongspung ula dep ban buh ia ka jingujor sha u Superintendent of Police ka Ri-Bhoi, kaba long pyrshah ia katei ka jingwan shna surok beain ka Sorkar Assam ha Bakhlara.
U pyntip ba ka Hima Nongspung bad ka Seng KSU, kila dep leit jurip ruh ia katei ka jingshna surok bad la lap bad pynshisha b aka Assam kala shu pyntrei beain ia ka surok khlem da ioh jingbit. U ong ba ka Hima kala hukum ban pynsangeh noh mardor ia katei ka kam.
Hynrei ula iathuh ba hapdeng kane ka hukum ka Hima, ka Sorkar Assam ka khlem patiaw satia bad leh bym suidniew da kaba pyniaid beit shakhmat ia ka kam.
Une u Nongialam ka KSU ula buh jingkylli ia u Superintendent of Police ka Ri-Bhoi halor ka jingbym leh eiei ia ka jingujor jong ka Hima Nongspung haba kynthoh “Lehse ki Pulit kim shym la shimkhia ia kane ka kam, kaba nang ailad ia ka Sorkar Assam ban leh donbor”.
U ong ba dei namar ka jingiohi ia kane ka jingkuman ki Pulit, ka Seng kam banse ban iakynduh ia u Addl Deputy Commissioner ban kyntu ba un tuklar lem mar mar ia kane ka kam.
U samla Receive ula pyntip ba u Raja Brahma ula kular ba un sa shimkhia ia kane ka kam.
