Shillong Jymmang 19: Ka samla Rifiness Warjri kaba la don 20 snem ka rta bad ka dkhot jong ka 61 Meghalaya Girls Battalion NCC, ka dei kawei na ki dkhot ka kynhun ba 38 ngut jong ki NCC kaba la pyndep ban kiew ia u Mount Everest uba don 8849 meter ka jingjrong ha ka 18 tarik Jymmang.
Kane ka samla kaba pule ha St Anthony’s College bad, ka dei kaba la shah jied marwei na ka thain Shatei Lam Mihngi ban iashimbynta ha ka NCC Mount Everest Expedition, 2025. Kane ka kynhun kala pyndep ban kiew ia u Lum Everest ha ka por 04:45 baje mynstep.
Kane ka jingjop jong ka samla Rifiness Warjri, ka pyni ruh ia ka jingtrei shitom, ka jingiaishah bad ka jinglah bad jingtbit jong ki samla ka thain shatei lam mihngi.
Ki arngut ki kynthei ka jylla Meghalaya kiba la kheit ia utei u soh ka jingjop ha ki snem kiba la leit ki kynthup ia ka kong Wansuk Myrthong kaba dei ka Police Constable kaba la kiew pyndep ia une u lum thah ha u snem 2013 bad ka Senior GCI Dolyne Kharbhih jongka 61 Meghalaya Girls NCC Battalion kaba na Ri Bhoi District, kaba la kiew pyndep ia une u lum ha u snem 2016.
Nalor katei, ha u Nailar jong u snem ba la dep, kala kiew pyndep ruh ia u Mount Abi Gamin uba don 7,355-mitar uba don ha ka jylla Uttarakhand.
Ka samla Rifiness Warjri kala pynlut iaka por khynnah ka jong ka ha Jylli Shop hashwa ba kan leit sah noh sha Kynton-u-Mon, Laitkor. Kadei ka khun kaba 3, napdeng ki 5 ngut shipara kiba dei ki khun jongu Bah Shlurbor Kharmyndai bad ka Kong Diamondsea Warjri kiba dei ki tyllong kiba la ai jingkyrshan ha shi linter ka jongim ka jongka.
Na ka bynta ki paidbah ka thain shatei lammihngi, ka jingjop jong ka samla Rifiness kala long palat ban ia ka jingjop shimet ka jongka bad long ruh kum ka jingkyrmen ia kiwei pat.
Ka jingsngewtynnad ka jong ka ban kiew lum kala sdang naduh ka por ba kala iadonbynta bad ka NCC ha ka por ba ka dang leit skul ha Auxilium Convent Shillong. Kadei lyngba ka NCC ba kala sdang ban sngewtynnad bad kiew shaphrang ha kane ka bynta bad kala lam ruh ia ka ban iashimbynta ha ki prokram ki bapher bapher jong ka NCC. Ha ryngkat ka jingdon ia ka jingangnud ban kiew lum, ka samla Rifiness kadei ruh kaba tbit ha ka jingialehkai Martial Arts, ka Wushu bad Kickboxing bad kala mihkhmat iala ka jylla ha ki lympung iakob jong kine ki jingialehkai.
Kine ki jingtbit bad ki jingshemphang ki jong ka, kila iarap ban tei ia ka met bad ia ka bor pyrkhat ka jong ka bad lam ruh sha ka jingjop ha ka jingkiew ia u lum thah Mount Everest uba la tip ruh kum ka ‘U Lum ba jrong tam ha pyrthei”.
