Tura, Jymmang 11 : Bun ngut ki briew kila poi sha hospital na ka jingkem pang kynsan kynsan hadien ka jingia bam ia ka dohkha bala sam ha ka Iing iap briew ha Adokgre, kaba don ha khappud ka North Garo Hills bad Assam.
Kane ka jingjia kala jia hynnin ka sngi Balang ha ka Shnong Mariampur jong ka Goalpara District, ha kaba bun ki briew na ki Shnong Garo kynthup ia bun ngut na Adokgre bad Kharkutta, kila leit sngewsnem sha kane ka Iingiap briew ban leit ontep ia uwei u nongshongshnong.
Ka sengtrei mon sngewbha na ka thain ka A.chik Organization for Social welfare (AOSW) kala pyntip ba ki don haduh 160 ngut ki briew kila kem pang kynsan hadien ba ki wan phai shala iing na kane ka jingleit ontep briew hadien ka jingdep bam ja bala ai da ka dohkha.
“Ngi kyntu ia ki bor District ka Ri-lum Garo ban peitngor bha bad ban phah khmih ia ki dohkha bad ki syiar pham kiba wan rah na Assam sha Ri-lum Garo. Ngi la sakhi ia ka jingjia hynnin ka sngi kaba long ha ka sien kaba ar ba palat 160 ngut ki briew kila ioh pang na ka jingbam dohha ha ka iingiap briew ha Mariampur, Goalara” ong u Gripping Marak President ka AOSW.
“Ha ka jingohkit la shem ba kane ka dohkha ka dei kaba wan na shabar ka Jylla bad la lap ruh ba bun ki briew kiba kem pang ki don ia kajuh ka jingpang. Ka ong ba ka dei ka dustur jong kane ka shnong ba ki ju tyrwa ja bad ka dohkha bad u dai ia kito kiba wan sha pyntngen” ula ong.
Ula ong ba kane ka juh ka dohkha ka dei kaba ju wan pynpoi sha ki katto katne ki jaka jong ka Ri-lum Garo ia kaba la dei ban pyrrkhing noh da ki bor pyniaid ka District khlem da pynslem shuh.
