Guwahati, Nailur 14: U Myntri Rangbah duh ka ri India, u Narendra Modi ha ka sngi Saitjain u la ong ba ka thain Northeast ka don ia ka bynta ba khraw bha ban kyntiew shaphrang ia ka ri India.
“Mynta, baroh kawei ka ri kala iaid shaphrang da ka jingiatylli bad long kawei ban tei khnang ban kyntiew ia ka ri India, khamtam eh na ka bynta ki khun samla, ka ri mynta kala kiew la ka long ha ka jingphoh sniew ne ka jingkut jingmut bad ka thain Northeast ka don ia ka bynta ba khraw ban pynurlong ia kane ka jingkut jingmut,” ong u Modi da kaba pynbna ruh ba ha ka spah snem kaba ar phew wei kala leit, “Ka chapter ka ban sa wan kan dei kane ka spah snem ka ba mynta bad kan dei jong ka East bad jong ka Northeast.”
U Prime Minister u la buh ia u maw nongrim bad u la plie ruh ia ki project kam pynroi kiba la kot kumba ₹6,500 crore ha Darrang district, da kaba u la kam ba ka jylla kaba kiew sted bha kum ka “growth engine” na ka bynta ki kam pynroi ka India.
Haba kren ha ka jingialang bah, u Prime Minister u la ong ba ka jylla Assam, shisien ka sngi ka iakhun ban ia iaid ryngkat bad kiwei ki jylla jong ka ri, hynrei mynta ka la nang kiew shaphrang da ka jingkiew kaba jan 13 percent. “Ka India ka dei ka ri kaba kiew sted tam ha ka pyrthei, bad ka Assam ka la kylla long kawei na ki jylla kaba kiew sted tam”, u la ong bad ai burom ia ka jingkiew sha ka jingtreilang jong ka sorkar kmie, ka sorkar Jylla, bad ki paidbah ka Assam.
Napdeng ki project kiba la pyllait paidbah ki kynthup ia ka Darrang Medical College and Hospital, Guwahati Ring Road, bad u maw nongrim na ka bynta ka jingkieng Kurua–Narengi halor ka wah Brahmaputra, kaba la pynduna ia ka por hapdeng ka Guwahati bad ka Darrang tang da ki katto katne minit.Ka ring road kan pyniasoh bad ki san tylli ki national highways, ar tylli kin dei ki state highways, ka airport, lai tylli ki railway stations, bad ka inland water terminal—kaba pyni ba ka Assam kadei kaba nyngkong eh ban pyniasoh ha ka multi-modal connectivity network.
Haba kyntu ïa ki nongshong shnong ban buh ha ka jingmut ïa kawei ka khubor kaba kongsan ha ka por lehkmen, u Myntri Rangbah u la ban jur ïa ka jingdonkam ban jied ïa ki mar tynrai, da kaba pynpaw ba ki briew ki dei ban thied ïa ki mar kiba la shna hapoh ka ri (Made in India), ki mar jingai sngewbha kin dei ba la shna hapoh India, bad ban pynthikna ba ki trai dukan ruh kin kyntiew bad die ïa ki mar kiba shna ha India.
U Modi u la pynbna ba un sdang naduh ka Navratri, yn pynduna bha ïa ka dor GST ha ki dew bilat, ki dawai, ki insurance, bad ki kali, kaba pynlong ïa ki tiar ïing, ka koit ka khiah ha ki jaka sumar, bad ka leit ka wan ba kin kham duna dor. “Kane ka jingpynkylla kan wanrah ia ka jingkmen ha ka por lehkmen ha man la ka longiing ha Assam”, u la ong.
Shuh shuh u la pynpaw ba ka sorkar ka pynleit jingmut bha ha ka tnad ka koit ka khiah, u Prime Minister u la pynpaw ruh ba ka Assam mynta kala don haduh 24 tylli ki medical colleges, kaba kiew na kaba don tang hynriew tylli shwa u snem 2014. U la buh ruh ïa ka thong ban pynrung shi lak tylli ki jaka (seat) ha ki jaka sumar thymmai ha baroh kawei ka ri ha kine ki 4–5 snem ban wan.
U Prime Minister u la pynpaw ka jingsngew sarong ia ka kolshor jong ka Assam, da kaba pynkynmaw ia ka pateng ne (legacy) u Bhupen Hazarik bad ia ka Patharughat peasant satyagraha, bad u la banjur ia ka jingshim khia jong ka sorkar ban pynneh pynsah ia ka jinglong kyrpang ka Asam. U la ther kylla ia ka liang pyrshah namar ba ki “pynshlur ïa ka jingwan buhai shnong” bad ïaroh ïa ka jingpyrshang u Myntri Rangbah ka Jylla u Himanta Biswa Sarma ban pynlait ïa ki jaka ba la shah ktah, da kaba kdew ïa ka Gorukhuti Agricultural Project kum ka nuksa ba la ioh kam biang ia ki jaka na ka bynta ki kam pynroi.
U la kynnoh ruh ia ka liang pyrshah, na ka bynta ki jingmyntoi shimet ha ka saiñ hima sima, kaba pynïahap ïalade bad ki briew shimet bad ki jingmut kiba pyrshah ïa ka India.Haba phai sha ka Operation Sindoor, u la kam ba wat ha kane ka kam ruh, kum kine ki jinglong ki paw shai.U la kynthoh ba ha ka por ba ka liang pyrshah ka don ha ka bor, ka ri ka la mad ïa ki kam lehnoh kiba la saphriang kylleng katba ka liang pyrshah ka la sngap jar.
Shuh shuh u la kynthoh ia ka liang pyrshah namar ba ki iadon liang bad ki shipai jong ka Pakistan ha ka jaka bad ki shipai jong ka ri India, bad ba ki kyntiew ia ka agenda jong kito kiba ai jaka sah ia ki lehnoh. U la pynskhem ba ki jingthok jong ka Pakistan ki kylla long ka jingïathuhkhana jong ka liang pyrshah, bad u la kyntu ïa ki paidbah ban long kiba husiar bha ïa ki seng pyrshah.
Da kaba pynskhem ba ka sorkar kan ym ailad ïa ki nongwan rung tuh ba kin trai halor ki marpoh khyndew bad ki jingdon jingem, u Myntri Rangbahduh u la pynpaw ba ïa ka hok jong ki nongrep ka ri India, ki samla, bad ki jaitbynriew riewlum jong ka ri India yn ym shah pynthut ha kano kano ka jinglong.
Ha kane ka sngi la ia donlang ruh da u Myntri Rangbah ka jylla Assam u
Himanta Biswa Sarma, u Myntri ka sorkar kmie u Sarbananda Sonowal, bad kiwei kiwei de ki heh ophisar.
