Shillong, K’lyngkot 05 :U Myntri Sorkar pdeng ba dei khmih ia ka Tnat ka rep ka riang bad ka bha ka miat jong ki nongrep, u Narendra Singh Tomar hynne ka sngi palei, u la plie paidbah ia ka Administrative cum academic block office jong ka College of Agriculture ha Kyrdemkulai, Meghalaya. U la plie ruh ia ka hostel na ka bynta ki kynthei jong kane ka College.
“Ka thain Shatei Lam Mihngi kalong kaba kongsan bha. Ka long ka jaka kaba don ki deiriti bapher bapher. Ka long ruh ka jaka kaba riewspah ha ki jingdon jingem ka mariang bad ka don ia ka jinglong ka suinbneng kaba sngewtynnad. Ka thain shateilammihngikadei ka bneng jong ka ri jong ngi bad ka jinglong ki jaka jong ka jylla Meghalaya kalong kaba ngi lah ban kyntiew lada ngi pyrshang da baroh ki sienjam,” la ong u Myntri Sorkar pdeng ha ka jingai jingkren ha ka North East KrishiKumbha – 2023 &49th Foundation Day ha ICAR Research Complex for NEH Region, Umiam mynta ka sngi.
U Tomar u la pynpaw ka jingkmen ba ka kam rep ka la long ka bynta ba kongsan.“Katkum ka jinglong ka juk mynta, kalong kaba donkam ban pdiang ia ki teknoloji ba thymmai. Ban pynthikna ka jingpoi kine ki teknoloji sha man u nongrep ha India, ha Meghalaya bad ban iarap kyntiew ia ka ioh ka kot kalong kaba donkam kyrkieh,” u la ong.
“Hapoh ka jingialam jong u Myntri Rangbah duh ka ri, u Narendra Modi, la peit bniah ia man ki bynta jong ka rep ka riang. Ki sienjam kum ka PM-Kisan, FasalBimaYojana, ka jingkyntiew ia ki lad digital ha ka kam rep, ka jingkyntiew ka jingbei tyngka ha ki jingdon jingem ba iadei bad ki kam rep kumjuh ruh ka jingsuk ban ioh ram ki nongrep ha kylleng ka ri la pynsuk hapoh ka jingialam jong u,” la ong u Myntri sorkarpdeng da kaba ban jur ia ki sienjam jong ka Sorkar ban kyntiew ia kane ka kam.
U Myntri u la ong ba dei ban burom ia ki nongrep, ki kam rep. “U Nongrep ym tangba u kyrshan ia la ka longiinghynrei u nohsynniang ruh sha ka ioh ka kot jong ka ri lyngba ka rep ka riang bad ka jingphaikhmat kyrpang jong ka sorkar jong ngi ka long ban pynthikna ka jingjop jong ki nongrep bad ka jingkyntiew ia ki kam rep,” la bynrap u myntri. Da kaba ban ba ka India mynta ym tangbakadei ka ri kaba pynmih mar bam hynreikadei ruh ka nongshalan, u Myntri u la ban ia ka jingbha jong ki mar bad ka jingkyntiew ka jingpynmih ia ki mar.
U Myntri u la ban ruh ia ka jingdonkam jong ki Agri-startup bad ba ka College of Agriculture hapoh ka Agriculture University, Imphal ka don ka bynta kaba khraw ha ka jingsaindur ia ki rukom rep kiba katkum ka juk mynta ban kyntiew ka jingpynmih ia ki mar rep.
“Nga sngewkmen ba ka thain shateilammihngi kalong ka jaka kaba paw ha ka jingrep organic. Ha ki por ba la leit, ka bhah ba bun jong ka jingshalania ki mar rep organic kadei na ka thain shateilammihngi,” u la ong. U Myntri u la bynrap ba ka thain shateilammihngi, hapdeng ki jingeh, ka lah ban pyndonkam ia ki jingdon jingem jong ka bad nohsynniang sha ka jingplie ki lad kamaikajih, ka jingrep bym pyndonkam dawai bad shibun kiwei kiwei.
“Ki ophisar, ki Scientist ba peit ia ki kam rep ki don ka bynta kaba kongsan ha ka jingkyntiew ka jingpynmih ia ki mar rep, ka jingkyntiew ia ka teknoloji, ban pynkynriah ia ka teknoloji na ki lab bad pynpoi sha jaka jong ki nongrep,” la ong u Myntri. Nga kyrmen baroh kiba don ha kane ka kam ki nohsynniang kat kaba ki lah sha ka jingkiew lang baroh, la bynrap u Myntri.
Shuh shuh, ban pynshlur ia ki paid nongrep bad pynpaw ka jingsngewnguh ia ka jingnohsynniang jong ki sha ka jingkyntiew ia ka kam rep, u Myntri sorkarpdeng u la ai khusnam ia ki nongrep. Ha ka jingialang plie, la pyllait ia ka Souvenir jong ka jingialang, ka kaiphod Taskforce bad kiwei kiwei ki kot bad la plie ruh ia ki Roll Amp African Swine Fever kit, Northeast Soil Plus (NES+) bad kiwei kiwei ki mobile app. La pyllait ruh katto katne ki tiar ba shna da ki nongtrei kam lajong ICAR ABI.
U K Moses Chalai, Secretary, North Eastern Council, Dr B C Deka, VC AAU, Jorhat, DrAnupam Mishra, VC, CAU, Imphal, Dr S K Chaudhuri, DDG (NRM), ICAR, New Delhi, Dr K M Bujarbaruah, DDG & VC AAU barim, Dr V K Mishra, Director ICAR, NEH Region bad ki heh ophisar jong ka Sorkar India bad Sorkar Meghalaya ki la iadonlang ha kane ka jingialang.
Ki mat jong ka North East KrishiKumbha – 2023 ki kynthup ka jingpyni ia ki kam bad exhibition jong ki teknoloji ba dang shen lyngba ki 102 tylli ki stall, da ka ICAR bad ki regional center jong ka ryngkat bad baroh ki ICAR institute ha ka thain kum ka, NRC on Orchid, Mithun, Yak, CPCRI, NBPGR kumjuh ruh ki institute bapher bapher bad ki kynhun kum ka NESAC, Central Agricultural University, Assam Agricultural University, NABARD, Coffee Board of India, NECBDC, ki tnat sorkar jong baroh phra tylli ki jylla bad kiwei kiwei. La don ruh ki prokram tynrai bad ki jaka ba die ia ki jingbam tynrai kaba la pyniasoh ia ki kam pynroi ia ka rep ka riang bad ka deiriti ba riewspah jong ka thain.
