Shillong, K’lyngkot 05: Ki 3 ngut ki MLA ka jylla kiba dang shu dep iehnohkam, kila pynpaw ba ka jingkwah ka jong ki ban rung sha ka seng NPP ka dei halor ka nongrim ban pynkhlain ia kane ka seng sain pyrthei ba kan ioh synshar marwei ia ka sorkar jylla ha u 2023.
Kine ki 3 ngut ki MLA kiba la iehnoh iaka kam nongthaw aiñ ki kynthup ia u Bah Hamletson Dohling uba long u Myntri Sorkar bad u MLA ka Mylliem na ka seng PDF, u Bah Jason Sawkmie Mawlong uba long u MLA ka Umsning naka seng PDF bad u Bah Samlin Malngiang uba long u MLA ka HSPDP na Sohiong bad u Myntri sorkar barim ka jylla.
U Bah Hamletson ula ong, ka jingiehnoh ka jong u ia ka kam MLA ka dei ba yn ioh ban pyniasoh noh bad ka seng NPP bad ula shim ia katei ka rai hadien ka jingai jingmut jong ki nongialam bad ki nongkyrshan ki jong u.
“Kum u nongialam ngam lah ban ialeh pyrshah iaka rai jong ki nongialam bad ki nongkyrshan bad nga la sngap iaka jingpynpaw ka jongki ba nga dei ban pyniasoh noh bad ka NPP” ong u Bah Hamletson.
Kumjuh ruh u MLA ka Umsning Bah Jason Sawkmie Mawlong ula ong “Nga la rai ban pyniasoh bad ka NPP halor ka jingkwah jong ki nongkyrshan bad ki paidbah khnang ba yn lah ban ioh ia ka sorkar kaba skhem bad kaba khlain ka ban ai ka jingsynshar kaba kham bha”.
U MLA ka Sohiong Bah Samlin Malngiang ruh ula ong “Ngi la iohi ba ka sorkar ha kane ka jylla kaba bunsien hi dei ka sorkar khleh khaw lang, ngi kwah ban pynkhlain bad ban ioh noh tang kawei ka seng kaban ialam iaka sorkar kaba lah ban ai iaka jingmyntoi ia ki paidbah. Hadien ba ngi la dep ban iamir jingmut bad ki nongkyrshan bad ki nongialam kiba hakhmat, la mih kawei ka sur ba dei ban leit pyniasoh noh sha ka seng kaba kham heh”.
Kitei baroh 3 ngut kila pynpaw ba kim don daw eiei pyrshah ia ka seng kaba ki don baroh shi katta hynrei ka jingthmu ban pyniasoh bad ka NPP kadei ban pynkhlain ia kane ka seng ba kan ialam iaka sorkar ban wan.
“Lada ngi la mih noh naka seng kaba ngi don, kan ym don kano kano ka jingktah ha ka elekshon, namar u paidbah u kham jied ia u kyrtong ban ia ka seng, kumta ka seng kan ym lah ban pynjop ia uno uno u kyrtong, hynrei kadei ka jingtrei shitom shimet shimet ha la constituency bad ki paidbah ki jied ia u briew uba trei, uba sngap ia ki paidbah bad uba leh bha ia ki paidbah bad uba wanrah ia ka roi ka par bad ka shongsuk shongsain” ong u Bah Samlin.
Halor ka jingkam u MLA ka PDF bad Myntri Sorkar Bah Banteidor Lyngdoh ba ula shah tyrwa pisa haduh T. 5 klur ban pyniasoh sha ka NPP, kine ki 3 ngut kila pynpaw “Ngim don jingtip eiei shaphang kata ka jingtyrwa pisa ban rung sha ka NPP… dei ban kylli na u Bah Banteidor Lyngdoh, hynrei ngi kum ki MLA ngi la leit ban pyniasoh na ka bynta ki mat kiba kongsan bad na ka bynta ki jingdonkam jongu paidbah haka constituency”.
