Guwahati, K’lyngkot 13 :Ka India ha ka 12 tarik mynta u bnai ka la thaw ia ka histori hadien ba u Myntri Rangbahduh (PM) Narendra Modi ula plie ia ka jhad shangkai MV Ganga Vilas kaba heh tam ka ban iaid ha ki jaka um hapdeng ka Varanasi bad ka Dibrugarh.
Kane ka jhad kaba jrong 62.5 mitarka lynter bad 12.8 ka pyngkiang ka don 18 tylli ki kamra kaba la shna paka bha bad la ong ba la pyndait ruh da ki tiar kiba lah ban iada na ka jingjakhlia ka lyer bad ka jingsawa.
Kane ka jhad ia kaba la tip kum ka Ganga Vilas Cruise kan pyniasoh ia ka Varanasi hapoh Uttar Pradesh shapoh Dibrugarh ha Assam, bad kan iaid ruh lyngba ka Kolkata shapoh Dhaka.Kane ka jhad kan iaid ha ka jingjngai kaba 3200 kilomitar lyngba ka Dhaka ha ki 51 sngi, kata da kaba jam lyngba ia ki 27 tylli ki wah kiba kdup ia ki santylli ki jylla bad artylli ki ri bad kan kdup ruh ia haduh kumba 50 tylli ki jaka jngohkai ba pawkhmat.
Nalor kata kane ka jhad kaba la pynbit pynbiang pura kan wan poi ha Dibrugarh ha ka 1 tarik u Lber mynta u snem da kaba iaid lyngba ha ka jingjngai kaba 48 sngi lyngba ki 27 tylli ki wah kiba don hapoh India bad Bangladesh.
Na ka liang u Myntri Rangbah (CM) ka Assam u Himanta Biswa Sarma, u CM ka UP u Yogi Adityanath, u Myntri ka sorkar pdeng uba khmih ia ka tnat Ports, Shipping & Waterways bad Ayush u Sarbananda Sonowal, U Myntri khynnah ka sorkar pdeng uba khmih ia ka tnat Ports, Shipping & Waterways bad Tourism u Shripad Naik nalor u Myntri khynnah uba khmih ia ka tnat Ports, Shipping & Waterways u Shantanu Thakur ki la ia don lang ha katei ka jingplie ia katei ka jhad.Nalor kine la pyniasoh lang ruh u Symbud Myntri Rangbah ka Bihar u Tejashwi Yadav lyngba ki kor internet.
