Shillong, Risaw 30: U Myntri ka tnat Arts and Culture bah Sanbor Shullai ha ka sngi saitjaiñ ula plie paidbah ia u mot sahnam jong u Dhyanada Charan Sharma uba la tei ha Kench’s Trace Shillong.
Ia une u mot sahnam jong u Dhyanada Charan Sharma ia uba ju khot ieid Bah Dhan, uba la noh synniang shibun iaka imlang sahlang, la tei da u Bah Sanbor ryngkat bad ka Raid Laban Sports, Social & Cultural Organization.
U Bah Sanbor ula ong ka daw kaba la pynlong ban tei ia u mot sahnam ka long ba ki pateng ba mynta kin tip shaphang u Bah Dhan bad ia u synniang kaba ula noh khamtam ia ka jingpyni ruh da ki kam ban pynrung iaka jingieid bad jingburom hapdeng ki jaidbynriew bapher bapher.
Ula iathuh ba u Bah Dhan ula sdang iaka kam trei mon sngewbha naduh ki snem 1947 bad kham tam ha kaban pynioh iaka jaka naka Cantonment ban tei iaka Shillong Civil Hospital, da kaba pyn sngew ha u Myntri Rangbahduh ka ri u Pandit Jawaharlal Nehru ha ka por ba u leit sha Delhi.
Ula pynkynmaw ruh ba u Bah Dhan udei u wei napdeng kiba la donbynta ban buh iaka jaka thang briew da ka bording elektrik, uba iadon bynta bha bad ka Laban Namghar ia kaba ula bat kum u President la palat 20 snem bad ula don bynta bad ka kynhun Arabindo Institute of Cultural Centre, ka jaka ri khunswet ne Orphanage jongka Shillong Hindu Mission, ka Central Puja Committee, ka Vivekananda Kendra bad kiwei kiwei ki kynhun.
