SHILLONG, Risaw 28: U myntri ka tnad CRD Block u bah Hamletson Dohling u ba dei ruh u MLA ka Mylliem konstitwensi hynne ka sngi ula plie ia ka kamra klas Computer ryngkat ka jingnoh synniang da ki kor Computer sha ka Sawmer Presbyterian Secondary School Sawmer ha ka jingiadonlang ka Principal, ki nonghikai lem bad ki khynnah skul.
Haba kren ha ka jingialang u bah Hamlet ula ai khublei kyrpang eh ia ki nongpyniaid jong ka skul kiba la trei shitom ban kyntiew ia ka pule puthi hapoh shnong bad ula ong ba kum u MLA ka thain un ialeh katba lah ban synniang lem sha ka skul ban iarap iaka skul ban kyntiew iaka pule puthi hapoh ka thain.
U bah Hamlet u la pynpaw ia ka jingsngewkmen ba u la lah ban noh synniang lyngba kine ki kor Komputer namar u la iohi ia ka jingdonkam shisha ia kine ki kor ki bor khamtam ha kane ka juk teknologi ba mynta.
U kyrmen skhem ruh ba lyngba kane ka jingnoh synniang, ka skul kan dang lah ban ai ka jingshakri kaba kham bha ia ki khynnah.
Nalor ki kor Komputer, u bah Hamletson ula pynioh ruh ia ka pisa kaba T. 11.92 lak na ka bynta ban shna pynheh ia ki kamra klas hapoh kane ka skul.
