Sohra, Lber 23: U Myntri ka tnad Pule Puthi Bah Lahkmen Rymbui ha ka sngi Nyngkong, u la plie paidbah ia ka ïingskul ba dang shu dep shna thymmai jong ka Mawmihthed RMSA Secondary School, East Khasi Hills district.
Ha kane ka sngi la iadonlang u Bah Gavin M. Mylliem MLA ka Sohra Constituency, u Bah T. W. Chyne MDC, ryngkat ki ophisar ka tnad Pule Puthi, ki bor synshar shnong, ki bor pynïaid skul, ki nonghikai, ki kmie ki kpa bad ki khynnah skul.
Haba kren ha ka jingialang u Bah Lahkmen Rymbui u la pynpaw ia ka jingsngewkmen halor ka jinglah ban pyndep ia ka ïing thymmai hapoh ka skhim RMSA, da kaba pynpaw ba ka sorkar ka dang ïai bteng ban pynthikna ia ka jingpule kaba bha bad kaba iaryngkat na ka bynta baroh ki khynnah skul, khlem da khein ia ki jingeh ha ka jaka. U la ban jur ba ka jingpynbha ïa ki jingtei ka dei ka bynta kaba kongsan ban kyntiew ïa ka jinghikai bad ban pynshlur ïa ki khynnah skul ban poi sha ki thong kiba kham halor.
Haba pynpaw ïa ka jingdonkam jong ka jinghikai, u myntri u la kyntu ïa ki samla pule ban ïashim bynta shitrhem ha ki kam ba shabar jong ka skul ryngkat bad ki jingpule, da kaba kdew ba ka jinghikai ka ïaid shabar jong ki kot pule ban kynthup ïa ka jingtei ïa ka jinglong bad ki jingnang jingstad ha ka jingim. U la khot ruh ia ki nonghikai ba kin ïai long kiba aiti bad ban don ia ki rukom hikai kiba thymmai ban pyndap ia ki jingdonkam ban nang kiew ki khynnah skul.
Shuh shuh u Bah Rymbui u la kyrpad ïa ki kmie ki kpa ba kin ia don bynta lang ha ka jingpule jong ki khun, da kaba ban jur ba ka jingïatreilang kaba khlaiñ hapdeng ki nonghikai bad ki kmie ki kpa ka long kaba donkam bha na ka bynta ka jingroi ki khynnah skul baroh kawei.
Haba pynkynmaw biang ïa ka jingkular jong ka sorkar hapoh ki jingthmu bapher bapher jong ka Samagra Shiksha, u la ong ba ki jingpyrshang ki dang ïaid shakhmat ban pynbha ïa ki jingtei, ban kyntiew ïa ki jingpule bad ban pyndap ïa ki jingduna ha ka jingïoh ïa ka jingpule ha kylleng ka jylla. U la pynthikna ba ka pule puthi kan dang ïai bteng ban long ka bynta kaba hakhmat eh na ka bynta ka jingroi ki khynnah.
Haba ai jingkren ha kane ka jingialang, u Bah Gavil M Mylliem uba dei u MLA, u la ban jur ia ka jingdonkam jong ka pule puthi ha ka roi ka par ha ka imlang sahlang bad u la iaroh ia ka jingshimkhia jong ka sorkar ban pynkhlain ia ka tnad pule puthi.
U Bah T.W. U Bah Chyne uba dei u MDC ka Sohra u la iaroh ia ka jingtrei shitom jong ka tnad pule puthi ban kyntiew ia ki jingtei jong ki skul bad ban jur ia ka jingdonkam ban bteng ia ka jingkyrshan ia ki jaka pule ha ki thain nongkyndong.
