Shillong, Jymmang 15 :U MLA ka South Shillong Constituency u Bah Sanbor Shullai hynne ka sngi Palei, ula plie paidbah ia ka Traffic Booth ha Laban Red Cross kaba la tei na ka Discretionary Grant u MLA kaba T.1 Lak 30,000 bad ula aiti syndon sha ka Shillong Traffic Police ban pyndonkam.
Haba kren ha jingialang u Bah Sanbor Shullai ula ong, ba ka jingtei ia kane ka Police Booth kadei hadien ka jingud jingnam jong ki paidbah bad khamtam ba kane ka thain kadei kaba thnem ka iaid ka ieng ki briew bad kaba don ia ki jaka pule, jaka sumar bad ka iew ka hat.
Ula ong, kane ka booth kan iarap ia ki pulit Traffic ba kin lah ban khmih bad pyniaid ryntih ia ka jingiaid ki kali ha kane ka jaka.
Hadien ba la dep ban plie ia kane ka Traffic Booth u Bah Sanbor ula aiti ha u SP Traffic u K Prasad ha ka jingiadonlang ki heh pulit, u Rangbah Shnong bad ki nongialam shnong.
Hadien kane, u Bah Sanbor Shullai ula plie sa ia ka painkhana ne ka Use and Pay Toilet kaba la tei da ka Shillong Municipal Board lyngba ka Swacch Bharat Mission kaba kot T.5 Lak.
U Bah Sanbor ula ong ba ka jingthmu ban tei ia kane ka painkhana ka long ba ki paidbah bad ki nongleit nongwan kin ioh ban pyndonkam bad ula kyntu ia ki paidbah ba kin sumar bad ba kin long kiba lehkhuid.
