SHILLONG, JYLLIEW 28: U Symbud Myntri Rangbah ka jylla u Bah Prestone Tynsong hynne ka sngi ba-ar, u la plie paidbah iaka khyrdop kaba la pynwandur thymmai jong ka Dr H Gordon Roberts Hospital, Jaiaw, kaba la noh synniang da u Nongaibuit jong ka sorkar jylla u Dr DD Lapang bad ka ïing ka sem jong u.
Haba kren haka jingialang u Bah Prestone Tynsong u la ong ka Roberts Hospital kadei ka hospital ym tang kaba sumar iaka met hynrei wat iaka mynsiem briew ruh bad u la ai jingiaroh bad sngewnguh ia ki Doctor, Nurse bad ki nongtrei jong ka hospital kiba la noh synniang iaka jylla ha ka jingiakhun pyrshah ia ka khlam COVID-19.
U Bah Prestone ula ong, ka hospital kala iaid lynti la 100 snem bad u ngeit skhem ba kan dang iai phyrnai bad iwbih bad ba kan dang iaid shaphrang.
“Kala don ka jingjia ha ki phew snem kiba la leit ha kaba la mih ha ki kot khubor, shaphang ka Hospital bad nga pang ka mynsiem, nga shu kwah ban ong, iaka Governing Board bad ia ngi baroh, ai ba ka histori kaba kum kata kan ym mih biang. Ngin iaid nangne shakhmat khlem da ailad shuh ba kato ka histori ka bym sngewtynnad kan wan jia biang sa shisien pat ha kane ka hospital” ong u Bah Prestone Tynsong.
U la ong, ka long kaba donkam ban pynsah nam ia u Dr H Gordon Roberts kumta ula kyntu iaki bor khmih jong ka Hospital ba kin phah da ka jingthoh sha ka sorkar jylla khnang ba kin ai nam ia ka surok haka kyrteng jong u Dr H Gordon Roberts.
U Symbud Myntri Rangbah u la ong, ka sorkar kan sa pynsah nam ruh ia u Thomas Jones ha kaba yn ai kyrteng iaka surok na Umtyngar shaduh Nongsawlia da ka Thomas Jones Road bad ha ka jingialang kaban wan jong ka kynhun myntri kan sa ai ia ka jingmynjur ia kane ka bynta ban pynsahnam ia u Thomas Jones uba long u Kpa jong ki Khasi Alphabet.
Katba u Dr Lapang u la ong, ka Roberts Hospital kadei ka hospital ka bym ju niew shiliang iano iano ruh, ha kaba uba long Khristan bad u bym dei Khristan ruh u ioh iaka jingsumar bad wat ki bar jylla ruh ki ioh ia ka jingsumar bad kane kadei ka jing khraw jong kane ka hospital.
U la ong ba ha ka jingiaid lynti 100 snem, ka Hospital kala mad ia ki jingeh kiba bun hynrei u Blei ym shim la ieh ne leh klet ia kane ka Hospital.
Ha kane ka sngi la iadonlang ka Kong Amethyst Lynda Blah kaba long ka kurim jong u Dr DD Lapang, u Chairman ka Hospital Governing Body u Rev SS Majaw, u Medical Superintendent jong ka Roberts Hospital u Dr R Nongrum, u MDC ka Mawhati u Bah Charles Marngar, ki doctor, ki nurses, ki nongtrei jong ka Roberts Hospital bad kiwei kiwei.
