Shillong, Rymphang 21: U Myntri ka Sorkar Pdeng ba khmih ia ka tnat ka Koit ka khiah Dr Mansukh Mandaviya, hynne ka sngi Balang, ula plie ia ka “Regional Consultative Workshop on Research Priority for Providing Accessible and Affordable Healthcare for the Northeastern States of India” kaba la pynlong ha nongbah Shillong.
Ia kane ka prokram la pynlong da ka tnat Health Research, hapoh ka tnat ka Koit ka Khiah, Sorkar India, ka Indian Institute of Public Health, Shillong bad ka Indian Council of Medical Research – Regional Medical Research Centre, Dibrugarh.
U Dr Mansukh ula plie ia kane ka Workshop lyngba ka kor digital ha kaba la iadonlang ka Dr Bharati Pravin Pawar, Myntri Khynnah ka tnat ka Koit ka khiah bad ka Dr Mazel AmpareenLyngdoh, Myntri ka tnat ka Koit ka Khiah jong ka jylla Meghalaya, ka Anu Nagar ka Joint Secretary jong ka tnad Health Research, u Sampath Kumar ubalong u Principal Health Secretary ka jylla Meghalaya bad kiwei kiwei ki ophisar Sorkar Pdeng bad ka Sorkar Meghalaya.
U Dr Mandaviya ula ong, “Ka jingthmu jong u Myntri Rangbah Duh Narendra Modi ka dei ban tei ia ka India kaba koit ba khiah, ka India kaba la kiew shaphrang ha kaba man ki briew jong ka ri ki dei ban ioh ia ka jingsumar ha ka por ba biang; ki jingsumar bad ki dawai ki dei ban long kiba jemdor bad kiba suk ban ioh bad ki lad jingsumar ki don ha baroh ki thain bad ka jingdon ka jingryntih ha ka jingioh ia kine.”
Ula ong ba ka jingpyrshang jong ka Sorkar ka dei ban pynthikna ba baroh ki ioh ia ki lad jingsumar ba ryntih khlem da don ka jingpeit shiliang hapdeng kiba duk bad kiba riewspah. Ban pynurlong ia kane ka thong, ka Sorkar ka la trei lyngba ki polisi bad ki skhim bad namar kine ka ri India ka la wanrah ia ki rukom treikam kiba ai jingmut ia ka jingngeit ha ka ‘Sarva Jan Hitay, Sarva Jan Sukhaay’.
“Ha ki 10 snem ba la dep, la shim ia ki sienjam ban pyniasoh ia ka thain bad ka ri da kaba pyniasoh ia ka lyngba ki kam kiba iadei bad ka koit ka khiah, ki surok, ki lynti rel, ki I-Way, ki lad ka leit ka wan lyngba ki jaka shong um bad ki Ropeway ha ryngkat kiwei kiwei. Ha ka sien kaba nyngkong ha ka ri, la peit ia ka thain shatei lammihngi kum ka kor jong ka roi ka par jong ka India. Ka jingsumar mynta ka don na ka bynta baroh kawei ka thain” ong u Dr Mansukh.
Ula ong, ba ha kine ki 10 snem ba la dep, la kyntiew ia ki jaka treikam kum ka RIMS (Regional Institute of Medical Sciences), RIPANS (Regional Institute of Paramedical and Nursing Sciences), NEIGRIHMS (North Eastern Indira Gandhi Regional Institute of Health and Medical Sciences) bad Assam AIIMS (All India Institute of Medical Sciences) bad la plie thymmai ruh ia 23 tylli ki medical kolej ha ka thain. Ka ICMR ka la saindur ruh ia ki jingai jingshakri ha ka koit ka khiah ha kane ka thain.
U Myntri ka Sorkar Pdeng ula pyntip ba “Mynta palat 31 klur ngut ki briew ki dei kiba la ioh ia ki Ayushman card ban ioh jingsumar hapoh ki hospital ha kaba ka longiing jong ki ka ioh ei haduh T.5 lak ha ka shi snem na ka bynta ki jingsumar, 11,000 tylli ki Jan Aushadhi Kendra kidei kiba la plie ha kaba ioh ia ki dawai kiba duna dor haduh 50-80%, la don palat 1.64 lak tylli ki Ayushman Arogya Mandiria kiba la khein kum ki Health Gate Keeper jong ki briew ka India bad la pyntreikam ia ka Health Surveillance System ba pura bad ka One Health Initiative na 48 tylli ki BSL Lab bad palat 22 lak ngut ki briew ba don jingshitom ha u khyllai ha ka ri ki la ioh ei ia ka Dialysis, kumba 6 klur ngut ki briew jong ka ri ki la ioh jingsumar ei lyngba ka PMJAY bad ka jinglut na pla ia baroh ki jingsumar jong ki briew ka la hiar na ka 62.6 % sha ka 47.1 %.”
Ha kane ka sngi, u Myntri u la plie paidbah ruh ia ka Iew bad ia ka Master’s Program ha ka Health Economics and Technology Assessment ha IIPH, Shillong.
