Shillong, Nohprah 20 : U Myntri Rangbah ka Jylla Conrad K Sangma hynne ka sngi ba-ar, ula plie paidbah sa ia ka Shallang Community & Rural Development Block (C&RD), ban pynjan ia ka jingshakri jong ka Sorkar sha u paidbah bad ban pyntyllun sted ia ki kam pynroi ha ki shnong ki thaw ka thain.
Ia kane ka Block ba thymmai la plie ha ka jingiadon ryngkat u MLA ka thain Bah Gigur Myrthong uba dei ruh u Deputy Chief Executive Member (DyCEM) ka Khasi Hills Autonomous District Council (KHADC), nalor ki Heh Ophisar ka West Khasi Hills, ki Khlieh Nongsynshar, ki Nongialam Shnong bad kiwei kiwei.
Haba ai jingkren ha ka jingialang, u Myntri Rangbah ula ong ba ka Sorkar MDA kala wanrah ia ki prokram bapher bapher na ka bynta ka bha ka miat ki paidbah. Ula ong ba ka Sorkar ka kwah ban pynthikna ba ki jingshakri ka Sorkar ki dei ban ioh da ki paidbah.
Ula ong ruh ba ka West Khasi Hills kala iai shah iehbein da ki snem hynrei ka Sorkar MDA kala wanrah ia ki kam pynroi bapher bapher hapoh ka District.
U Myntri Rangbah ula pynshlur ia u BDO kane ka Block ba thymmai ba un ai ka jingshakri naduh ka mynsiem ia ki paidbah bad ban pynthikna ba baroh ki jingmyntoi jong ki skhim ka Sorkar kin poi sha ki paidbah ha manla ki shnong ki thaw.
U Bah Gigur Myrthong ula ai ka jingiaroh ia u Myntri Rangbah halor ka jingshimkhia ban pynkha ia ka C&RD Block ha Shallang. Ula ai khublei ruh ia u Myntri Rangbah ba ula pynleit jingmut lang kumjuh ia baroh ki jaka hapoh ka Jylla khlem da peit shiliang khmat.
U Principal Secretary ka Tnad C&RD hynne ka sngi, ula pynmih ia ka jingpynbna bala pynkha ia kane ka Block ba thymmai bala tip kum ka Shallang C&RD Block.
Kat kum ka jingpynbna, ki Shnong kiba la pynhap ha kane ka Block ki don haduh 97 tylli ki Shnong bad kine ki kynthup ia ka Riangshiang, Jynruniangbrak, Iewjynru, Dadu, Dohde Mawkohram, Mangsangdaso, Nongwar Pyndeng, Nongwardro, Langumshing A, Langumshing B, Riangba, Mawkhap, Jynra, Nongjaiaw, Snaram, Porksai, Mawlai, Langshonthiang, Iawnaw, Mawlong, Pormawlai, Umdang, Thawkhong, Pyndengmawlieh, Nongdaju, Nongdagong, Riangkhain, Shallang Sohbar, Shallang Songsak, Nongrongdu, Nongshram Wakatak, Rongkhugre A, Rongkhugre B, Shongbiang, Riangju, Songsak, Riangka, Nongshram Adeng, Dalbot Rongbeng, Swangre Daat, Damangre, Dalbot Dagar, Dalbot Dachar, Swangre Waso, Swangre Megachil, Swangre Acheng, Rongkhang, Swangre Nongrim, Swangre Hamegoan, Swangre Chengsi, Nongshram Rongbeng, Dymmut Dapo, Dymmut Daong, Chimimang, Rongjambi, Dorangre B, Dorangre A, Khemering, Wahthre, Nonghynrum, Pyndengrathaw, Awiak, Jukisil, Thodmari, Goreng A, Goreng B, Mawbon Riangna, Mawbon Chithu, Mawbon Agar, Kyllon Mathei, Langtur, Miangmawdor, Riangud, Nengchigre, Matchokkhanram, Niangju, Bokchung, Riangshi A, Rongram, Rongthok, Shinianggri, Agitchak, Riangdim, Tarajak, Wakpangram A, Wakpangram B, Khalu B, Khalu A, Nirang, Langmar, Sohmyntang, Mawshut, Waitwiang, Riangmaw bad Riangna.
Ha kane ka sngi, u Myntri Rangbah ula aiti ruh ia ki Focus Plus card bad sam ia ki khun sniang bad khun syiar na ka skhim Progress sha ki nongrep bad ki nongri jingri jong ka thain.
