Shillong, Naiwieng 11: U Myntri Rangbah ka jylla Conrad K Sangma, ha ka sngi Ba-ar, ula plie ia ki kamra klas kiba thymmai jongka Ri Bhoi Synod College ba don ha Umsaitsning.
Ha kane ka jingialang la iadonlang u Myntri Sorkar ba khmih ia ka Community & Rural Development, SAD bad GAD Bah Sosthenes Sohtun, u MLA ka Umsning Dr C Lyngdoh bad kiwei kiwei.
Haba kren ha ka jingialang u Myntri Rangbah ula ong ba ka jingkynshew tyngka ha ki kam ban pyntbit ia ki nongshongshnong kadei ka jingkynshew kaba heh tam ba hap ban leh.
“Ka jingkynshew tyngka ia ki surok, ki jingtei, ki long ki bym don jingmut khlem ka jingkynshew ha ka jingpyntbit ia ki briew” ula ong haba bynrap ba dei ban plie lad ia ki samla ba kin kiew bad ba kin iakhun ha ki kyrdan kiba heh, kumta donkam ban btin lynti bad ban saindur bha ia ki.
U Myntri Rangbah ula pyntip ba ha kaba iadei bad ka jingkynshew ha ka pule puthi, ka sorkar jylla kala kyrshan ia 4172 ki skul shimet da kaba ai jingiarap 65 % na ka bynta ka tulop jong ki nonghikai ha ki skul shimet.
“Ki nombar ba iadei bad ka jingkyrshan jong ka sorkar ia ki skul bad ki college shimet kala long kaba palat ban ia kiwei pat ki jylla ha ka thain shatei lammihngi hynrei ka jingmih ka result pat ka long ka bym poi pyrkhat” ula ong.
Ula ong shuh shuh ba ka jongdon bun kyrdan palat ki skul ka long kaba kyllain bad ka dawbah jong ka jingeh ka don ha ka liang ka pule puthi.
Ula pyntip ruh ba kila don 206 tylli ki skul ki bym shim la don satia ia ki khynnah skul bad kila don pat 2269 tylli ki skul kiba la don khynnah hapoh ka 10 ngut.
“Ka don ka jingeh kaba khraw hakhmat jong ngi ban pynbeit ryntih ia ki skul bad ka jingdon bun kyrdan ki skul bad ka jingpynbeit ryntih ia ki nongnihkai khlem da ktah ia ka kamai kajih ka jongki” ula ong.
Ha kaba iadei bad ki jingpule ha ka kyrdan kaba heh bad ki college, u Myntri Rangbah ula ong ba ka sorkar kala pynlut kumba T.120 Klur ha kaban ai iaka tulop ki nonghikai ha ki college shimet. Ula ong ruh kiba bun na kine ki college kidei kiba don ha Shillong hynrei ia ki college la donkam ruh ha ki thain nongkyndong bad ula kren ruh ha kaba iadei bad ka jingthmu ban buh ia ki 23 tylli ki Peoples College ha kylleng jong ka jylla khamtam ha ki jaka ki bym don satia ia ki college ha ki shnong ki thaw.
“Nga dap da ka jingkmen ban lap ba kane ka college hapoh jongka Chief Minister’s Special Development Fund namar ba kane ka college kala ai jingshakri ia ki paidbah bad ia ki samla pule bad ka don ia ka bynta kaba khraw ha kaban ai jingnang jingstad ia ki samla pule kiba don ha kane ka jaka bad kumruh ia kiba na kiwei ki jaka” ula ong
T.23.72 lak hapoh jongka CMSDF 2025-2026 la bhah tyngka na ka bynta ban tei ia ki kamra klas kiba thymmai ia kaba la plie noh ia ki hynne ka sngi.
