Shillong Nailar 25: U Myntri Rangbah ka jylla u Conrad K Sangma, ha ka sngi Nyngkong, ula plie ia ka Youth Mela kaba la pynlong da ka Chief Minister’s Youth Centre ha All Saints’ Hall, Shillong, ha ka jingiadon ryngkat ka Myntri ka rep ka riang ka Dr Ampareen Lyngdoh.
Haba kren ha ka jingialang u Conrad K Sangma, ula ong ba ka sorkar ka ngeit skhem ba ym lah ban thew ia ki kam jong ka roi ka par da ki nombar ne da ka jingdon ia ki jingtei kiba heh, “Ki kam pynroi kidei ki bynta kiba hap ban peit na kiba bun ki liang bad haba ka GDP bad GSPD ka long kaba kongsan hynrei kan ym long kaba pura lada ngim lah ban pyniasoh bad ki nongrep, ki nongsengkam ha ki thain nongkyndong, ki longkmie, ki samla bad ban pyniasoh bad ki bynta ki bapher bapher kiba iadei bad ka imlang sahlang naduh ka koit ka khiah, pule puthi, ki kam jngohkai ha nongkyndong, ka rep ka riang bad kiwei kiwei”.
Ula ong ruh ba ka sorkar kala pynlong ia ki prokram kiba iadei bad ka jingsengkam ha ki kyrdan ki bapher bapher ban pynthikna ba ka jingsengkam kan ym dei tang ia ki karkhana kiba heh ne ka kam khaii kaba heh, kaba yn klet noh ia ki jingsengkam kiba rit ba ria.
“Kane ka prokram kadei kaba ma phi baroh phi dei kiba donbynta lang ha ka khana jong ka roi ka par jong ka jylla Meghalaya bad kam pher lada ka long kumno kumno ruh ka jingsengkam ka jong phi” ula ong.
Ula pynpaw ruh ia ka jingkyrmen ba lyngba ki 64 tylli ki Chief Minister’s Youth Centres kiba don ha kylleng jong ka jylla ki nongsengkam kiba rit kin ioh ia ka jinghikai bad jingbtin lynti ban kiew ha ki kyrdan ki jongki ha ka lynti jong ka kam khaii pateng.
Ka CMYC kadei ka jaka ban ai jinghikai ha kylleng ki thain nongkyndong jong ka jylla ban plie lad ia ki samla ban don ia ka rynsan ban saindur ia ka sap ka jongki ha kaba iadei bad ka kam khaii pateng. Kine kidei ki jaka kiba lah ban ioh ei ia ki jinghikai ha ki shnong kiba don ha ka thain nongkyndong kiba don ia ki tiar ki tar, ki jingleh ia ki kam bapher bad ki jaka ban ioh jinghikai kiban don ia ka jingiadei kaba iajan bad ka imlang sahlang.
Ka sorkar Meghalaya, lyngba ka jingkyrshan jongka Sauramandala Foundation ka don jingthmu ban thaw 64 tylli ki jaka ai jinghikai ha ki thain nongkyndong kiba don ha kylleng ka jylla Meghalaya, hapoh ka lama jongka Chief Minister’s Youth Centers.
Ka Sauramandala Foundation kadei ka kynhun trei mon sngewbha kaba la seng ha u snem 2018 da ka jingthmu ban shimkhia ia ki jingeh kiba mad da ki shnong ki thaw kiba don ha nongkyndong ban kyntiew ia ka imlang sahlang bad ia ka ioh ka kot bad ban wanrah ia ka jingkylla lyngba ka jingiatreilang bad ban shim ia ki lad kiba dei halor ki jingdonkam jong ki paidbah.
Kane ka Youth Mela kaba 4 sngi kaba la sdang ha 25 tarik kan kut ha ka 28 tarik kan kynthup ia ka jingiatai, workshop, jingpyninam ia ki projek, library corner bad ki jingialehkai na ka bynta ki khynnah rit.
U Myntri Rangbah ula plie ruh ia ka CMYC++ ha katei ka jingialang bad ula sam ruh ia ki Nano Grant Awards sha ki Top 50 Nano Entrepreneurs ne ki nongseng ia ki kam barit.
