Shillong, K’lyngkot 23: U Myntri Rangbah ka Jylla Conrad K Sangma, hynne ka sngi Ba-ar, ula plie paidbah ia ka Wahiajer Multi Sports Complex bad kyntu ia ki paidbah ka thain ba kin ai ka jingiatreilang na ka bynta ka Meghalaya Games ka ban long ha Jaintia Hills ha u snem ban wan.
Ia kane ka Sports Comples la plie ha ka jingiadonlang ki arngut ki Symbud Myntri Rangbah ka Jylla Bah Prestone Tynsong bad Bah Sniawbhalang Dhar nalor u Myntri ka tnad ialehkai Bah Shakliar Warjri.
Haba ai jingkren, u Myntri Rangbah ula ong ba ka jingplie ia ka Pa Togan Nengminja Athletics Stadium ha Tura ha ka taiew bala lah bad ka Meghalaya Games ba dang shu kut, ka dei ka jingai sakhi ban pynshisha ba ka Sorkar ka da kut jingmut shisha ban theh sha ki samla jong ka Jylla.
“Ka jingkynshew ha ki kam ialehkai bad ka jingshna ia ki madan kala nang kiew ha kine ki khyndiat snem ban ia ki 45 snem bala leit noh” ula ong haba ban jur ia ka jingshimkhia ba khlem sangeh jong ka Sorkar ban shna ia ki madan ialehkai ha kylleng ki bynta jong ka Jylla ha kine ki san snem ban wan.
U Myntri Rangbah ula kyntu ia ki Dorbar Shnong, ki paidbah bad ki nongialam ba kin ai ia ka jingkyrshan jong ki sha ka jingjop jong ka Meghalaya games ban wan, ka ban long ha Ri-lum Jaintia ha u snem ban wan.
Ula pyntip ruh ba ka Sorkar kan sa pyndon burom ia baroh ki nongialehkai kiba ioh khur takma na ka lympung Meghalaya Games ba dang shu dep ha Tura, ka ban long ha Shillong.
“Ki Nongjop kin ioh ia ka jingiarap song pisa na ka Sorkar khnang ba kin lah ban pyntbit shuh shuh ialade bad ka jingialehkai kaba kila jied” ula bynrap.
U Myntri Rangbah ula pyntip ruh ba ka Sorkar ka don jingthmu ban pynbun ia ki kam na ka bynta ki samla la ka dei ha ka Arts, Sports, sengkam sengjam ne ka put ka tem. “Ngin sa don ruh ka jingiakop ha ka Science, Maths bad Innovation ban kyntiew bad pynshlur ia ki samla ka Jylla ha kine ki kam” ula ong.
Ula pyntip ruh ban pynlong ruh ia ka Inter Constituency Football Tournament ka ban sa pynbna shen. “ Baroh 60 tylli ki Constituency kin sa iakhun bad sa jied ia ki nongialehkai na ki constituency bapher bapher. Kane kan plie lad ia ka thain ba kin mih ha ki jingiakop, tip ia ki buit ialehkai bad kaba kham kongsan eh ka long ban wanrah ia ka jingiadei, ka jingsuk bad jingiatylli hapdeng ki nongshongshnong ka Jylla” ula ong.
Hadien kane ka jingplie, la pynlong pat ia ka jingiakhun phainal jong ka 3rd Sniawbhalang Football Tournament. Ka Wahiajer Football Field bad Synthetic Athletic Track Stadium ka lah ban ngiam haduh 4300 ngut ki nongpeitkai bad kaba don ia ka jaka ba heh ban pynieng kali.
