Plie u CM ia ka Tri Hills Ensemble, ban jur ban hikai ia ki samla halor ka deiriti bad ka tynrai

By
Ka Shlem
-
0
16

Shillong, Risaw 14: U Myntri Rangbah ka Jylla Conrad Kongkal Sangma hynne ka sngi thohdieng, ula ban jur ia ka jingdon kam ban ai jingikai ia baroh khamtam ia ki samla bad kin tip iala ka deiriti bad ka tynrai lajong.

U Myntri Rangbah ula kren ia kane haba plie ia ka tamasa Tri Hill Ensembly ba-ar sngi, kaban pynpaw pyrthei ia ka deiriti, ki bam tynrai, riam tynrai, jingrwai bad jingshad bad ki drama jong ki paid Khasi Jaintia bad Garo. U Myntri ka Tnad Arts & Culture Bah Sanbor Shullai ula iadonlang ha kane ka sngi.

Haba ai jingkren, u Myntri Rangbah ula ong ba kane ka snem ba mynta ka dei kaba biang eh naba ka Ri India ka dang rakhe ia ka jingdap 75 snem ka jingioh laitluid bad ka Jylla Meghalaya ka rakhe ia ka jingdap 50 snem ka jingioh iala ka jong ka Jylla.

“Ka dei kaba biang palat ba ngi don ia kum kine ki prokram nala tynrai ba kum kane kaban neh arsngi, kaba long ym tang ban shu lehkmen iala ka deiriti hynei ban sngewthuh ba ngi la kynjoh 50 snem kum ka Jylla bad kynjoh 75 snem kum ka Ri” ula ong bad bynrap ba kum kine ki prokram ki iarap ban pynkynmaw ialade halor ka histori ba ka Jylla bad ka Ri ka don.

U Myntri Rangbah ula ong ba baroh, khamtam ki samla ki donkam ban ioh ia ka jinghikai bad ioh jingtip iala ka jong ka deiriti bad ka tynrai. “Kiba ki arsngi kim dei satia tang ka jinglehkmen ia ka deiriti bapher bapher ba ngi don hynrei ka dei ruh ka jingpynkynmaw bad ka lad ia ngi ban pynthikna ba ki samla kin ym klet ba ki dei kiei bad ban sarong iala ka tynrai bad ha kajuh ka por ban burom ia ki deiriti jong kiwei” ula ong.

U Myntri Rangbah ula ong ba ka jingpynneh pynsam iala ka deiriti ka dei kaba kongsan bha bad ba hap ban shimkhia thikna. “Ngi kwah ban ai ka jingkyrshan pisa sha ki hynriew tylli ki shnong ki ba la ioh khusnam mynta ka sngi khnang ba kin nang bteng ban leh kham bha ia kaei kaba ki leh bad ngin pynthikna ruh ba kum kine ki khusnam bad jingithuh kin long manla u snem khnang ba kin pynshlur ia kiwei ki shnong ruh kumjuh” ula ong.

Shuwa kane, u Myntri Rangbah ula aiti ia ki khusnam “Recognition for Development of Arts and Crafts Villages” sha ki hynriew tylli ki Shnong ba kynthup ia ka Wahkhen, East Khasi Hills kaba dei ka jaka ba pynmih ia ki tiar tem tynrai, ka Larnai,West Jaintia Hills kaba dei ka jaka shna khiew rynnei, ka Pahambir, Ri-Bhoi ka jaka ki khana jong ki pateng ba mynshuwa (folklore), ka Tangmang, East Khasi Hills kaba dei ka jaka ki nongthain shken, ka Mairang, Eastern-West Khasi Hills kaba dei ka Arts District bad ka Amindagre, West Garo Hills kaba don ia ka Living Woodcraft Museum.

U Myntri Rangbah ha kane ka sngi ula plie paidbah ruh ia ki motsah nam ba shi rynieng jong ki laingut ki khla wait ka Jylla Meghalaya kata u Tirot Sing, u who Kiang Nongbah bad u Pa Tohan Nengminza kaba don ha Soso Tham Auditorium. Nalor kane, ula pyllait paidbah ruh ia ki kot jong kine ki riewshlur.