Shillong, Naiwieng 21 : U Myntri Rangbah ka Jylla Conrad K Sangma ha ka sngi Palei, ula plie paidbah ia ka tamasa Tri Hills Ensemble ha ka jingiadonlang u Myntri ka Tnad Arts & Culture Bah Paul Lyngdoh bad u Heh ka Sorkar Wales sha India Mitchell Theaker ha Soso Tham Auditorium, Shillong.
Kane ka tamasa ka dei kaba lai bala pynlong ha Jylla bad ka jingthmu jong ka, ka long ban pyni sha ka pyrthei ia ka spah ha ka deiriti, ka kam thain jingthain bad ka mattithaw (culture) jong ki lai tylli ki Jaidbynriew ka Jylla- ki Khasi, Jaintia bad Garo.
“Ka tamasa ka dei ka jinglehkmen ia ka mattithaw jong ngi, ka imlang sahlang bad ki briew jong ngi. Lyngba kane ka tamasa, ngi thmu ban pyni sha ka pyrthei ia ka jingriewspah ka Jylla bad ka jingithuh ia ka jinglong kyrpang ki briew jong ngi” ong u Myntri Rangbah ha ba ai jingkren.
Haba kren halor ka jingkongsan ka mattithaw, u Myntri Rangbah ula ong “Ka mattithaw ka don bun bah ka bor bad ka lynti nab aka pyniasoh ia ngi bad ka tynrai jong ngi, ka mynnor, ka jingithuh ba kyrpang bad ka jingiapher ia ngi na kiwei. Kum kawei na ki bor, ngi la pyrshang kum ka Sorkar ban pyndonkam ia kane ka spah na ka bynta ki jingthmu kiba tei”.
U Myntri Rangbah ula ong ruh ba ka Sorkar kala wanrah ia ka lynti iaid ban ai mynsiem ia ki pateng ba mynta ba kin sngew sarong iala ka jong ka mattithaw bad ka jingdon ki briew ba iapher na kawei ka thain sha kawei pat jong ka Jylla. Ula pyntip ba ka Sorkar kala shna ia ki prokram ki ban kyntiew ia ka mattithaw, ki deiriti bapher bapher, ka put ka tem, ka thok ka thar bad ka jingstad u menbarim.
“Ngi kwah ba ki briew jong ngi kin sngewsarong iala ka jong ka mattithaw, ka riti dustur bad ka ktien ka thylliej” ula bynrap.
Ula iaroh ruh ia ka Tnad Arts & Culture halor ka sienjam ba ka shim ban pynkylla dur ia ka Captain Williamson Sangma Museum haba kyntu ia ka Tnad Pule Puthi ban pynlong kongsan ia ki jaka pule ba kin ialam ia ki khynnah sha kane ka museum ba kin tip shaphang ka jingai pateng bad ka spah ba don jong ka Jylla jong ngi.
Haba kren halor ka Chief Minister’s Research Fellowship Programme, ula ong ba 50 ngut ki scholar la dep ban jied, kiba la pynkhreh ban buh jingthoh ia ki mat bapher bapher kiba don jingiadei bad ki briew lem bad ka mattithaw jong ka Jylla.
Ha kane ka sngi, u Myntri Rangbah ula pyllait ruh ia ka web portal jong ka Arts & Craft Village bad pynbna ia ka jingai khusnam bad jingithuh ia ki riewpawkhmat ha ki kyrdan bapher bapher.
Literary: Dr. Kynpham Sing Nongkynrih & Janice Pariat
Tribal Museum: Kyntiewbor War
Tribal Entrepreneurship: Dasumarlin Majaw and D Kharbuli
Woodcraft: Gilford Pde
Film Making: Pradip Kurbah, Dominic Sangma and Simi Kongthiang
Fashion and lifestyle: Angelia Marwein
Performing arts: Steve Jyrwa, winner Dance India Dance
Indigenous cuisine: Mei Ramew Café
Bamboo Craft: Ricky Kynter and Bandap Dewkhaid Shillong Bamboo
Nalor kane la pyllait ruh ia ka kot “A Synthesis of Rhythm & Art”, kaba buh jingthoh ia ki jingshad tnrai jong ka Meghalaya. Kane ka kot ka dei kaba la prat lynti da ka Sankardev College ha ka jingiatreilang bad ka Tnad Arts & Culture.
La pyllait ruh ia ka kot “U Spor na Thwei Pyrkhat” bala thoh da u Banjop Leo Gregory Kharmalki bad ka KOT (Khasi Old Testament) bala thoh da u bah Raphael Warjri.
