Shillong, Jymmang 01: U Myntri Rangbah ka jylla u Conrad K Sangma hynne ka sngi Palei ula plie ia ka Culinary Cascade 2025, kaba dei ka jingrakhe ia ka jingriewspah jong ka jylla Meghalaya ha ka jingshet ia ki bam tynrai bad ia ka jingshet ia ki jingbam kiba thymmai.
Ka Culinary Cascade kadei ka tamasa bam na ka bynta ban rakhe iaka jingshet ia ki jingbam tynrai jong ka Meghalaya, ka jingiar jong ka kolshor bad ka jingiaid lynti ha ka jingsengkam lajong. Kaba khlehlang ia ki jingbam kiba naduh kiba rim ba jah bad ka rukom shet ia ki jingbam katkum kane ka juk kaba mynta, kaba burom lang ia ka rukom shet ia ki bam kiba mynshwa bad mynta.
Haba kren ha ka jingialang u Conrad Sangma ula ai khublei iaka tnad Tourism bad ia baroh kiba don bynta lang kiba la lah ban pynlong ia kane ka prokram kaba jop.
Ula ong ba ka Culinary Cascade ka long palat ban ia kaba shu shet ia ki jingbam hynrei kadei ruh shaphang ka kolshor, ka jingstad kaba la ngam jylliew kaba la ioh pateng na ki longshwa manshwa. Kadei ruh shaphang ki kabu kiba bun na ka bynta ki nongsengkam kiba mynta kin lah ban thaw ia ka jingkordor shaphang kane ka jingshemphang bad ruh ban lah ban sam lang sha ka pyrthei baroh kawei bad khamtam eh sha ki nongrep.
U Myntri Rangbah ula kren ruh halor ka jingdonkam ban ithuh ia ki jingshimkhia bad ban ai jingkyrshan ia ki trai jong ki dukan bam (Restaurant), ki nongsengkam, ki jaka die bam bad ki nongrep. Ula ong ba ka kam jngohkai kam dei tang na ka bynta ban pynlong ia kino kino ki tamasa, hynrei kadei kata kaba donkam ban thaw ia ka sawdong sawkun kaba biang. Palat T.1000 Klur ki projek kiba iadei bad ka kam jngohkai, ha kaba iadei bad ka jingthaw ia ki jingtei, kidei kiba la leh. Ula kyntu ia ki nongiashimbynta kynthup ia ki riewpaidbah ba kin long kum ki nongkit tiensyiem ha kum kine ki prokram bad ban pynsaphriang ia ki khana sha kylleng ki jaka namar ba ka khana ka dei shaphang jong baroh ki riewshiemt kiba don hangtei.
U Conrad Sangma ula pyntip ruh halor ki kam na ka bynta ban pynbha bad pynitynnad ia ka Ward’s Lake kum ka jaka kaban kynthup ia ka jingdon ia ka jaka iaid kjat, ka jingthaw ia ki jaka ieng kali bad ki dukan kaba ki paidbah ki lah ban ioh ia ki lad. Ha ka wat kaba mynta, kumba T.25 klur la dep ban bhah ia ka pisa. Kila don palat ia ka T.1000 Klur kiba la bhah na ka bynta ki projek ha ka kam jngohkai bad kine ki jingtei kidei kiba dang leh mynta. Kin don sa 4 tylli ki 5 Star Hotel ha kine ki 3 snem kiban wan bad kine ki dang don ha ki lynti ha ka jylla Meghalaya bad ki jaka sah shipor ne Glamping Site kiban sa mih ha kine ki 1 snem haduh 18 bnai.
Ula bynrap ruh ba jan kumba 2500 tylli ki Home Stay kiban sa ai iaka jingmynjur bad kaba kham kongsan tam kadei ka jingioh jingmynjur ban pynheh ia ka Shillong Airport, ki liengsuin kin wan beit beit sha ka Shillong Airport na Delhi, Mumbai, Hyderabad, khnang ba kan ym don shuh kano kano ka mat jong ka jingeh ha kaba iadei bad leit ka wan.
U Director u Bah Cyril Diengdoh ula ong, ba ka Culinary Cascade ka wanrah lang ia baroh ki nongri nongsumar bad ia ki stad ha ka shet ka tiew ha kawei ka rynsan ban pynthikna ba ki paidbah khamtam ki nongjngohkai kin ioh ia ka lad ban mad ia ki jingbam tynrai haduh ki jingbam kiba la khleh lang, sha ki jingbam kiba paw ha ka pyrthei haduh ki jingbam kiba shet ha surok bad ka jingpyni shisha ruh ia ka rukom shet ia ki jingbam.
Ha kane ka sngi plie ia ka tamasa, ki heh ki hain kila leit jngoh ia ki jaka die bam bapher bapher bad kila iakren ruh bad ki nongseng kam seng jam ha ka jingshet ia ki marbam. Ka jingdon jongki kala pyni ia ka jingkyrshan bad jingaiti jongka sorkar na ka bynta ka kam jngohkai ha kaba iadei bad ka jingshet ia ki jingbam bad ka jingsengkam ha ki shnong ki thaw ka jylla Meghalaya. Kawei kaba la kham kongsan ha kane ka prokram, kadei ka jingpyni halor ka phang ‘Fermentation: Cooking on fermented dishes – Ongoing food lab’ da u nongshet uba pawnam u Jason White, Chief Culinary Scientist & Global Fermenter, ka Ahmedaki Laloo kaba dei ka Culinary Chef, ka nongsengkam bad ka nongseng ia ka A’Origins bad ka Tanisha Phanbuh ka Culinary Maven & nongseng jong ka Tribal Gourmet.
Ka Ahmedaki Laloo, kala ong ba kane ka tamasa kala ioh ia ka jingkyrshan kaba radbah na ka Sorkar Meghalaya, kaba la sdang ban pynjanai ia ki karkhana bam ba kin long kiba khlain bad kiba kyrpang, ban rakhe ia ka jingriewspah ha kaba iadei bad ka jingshet ia ki jingbam tynrai kiba la rim bala jah ka Meghalaya. Kala ong ba ka jingkyrshan ia ki karkahan shet bam kadei ruh kum ka jingkyrshan ia ka ioh ka kot jong ka shnong bad ki nongrep kiba long kongsan bha ha kaban wanrah ia ki ia ki marrep ki jongki bad ia baroh lang kiba donbynta ha kaban pyniaid shakhmat ia ka kam shet. Kane ka tamasa kam dei eh tang ban pyninam ia ki jingbam ki jong ngi, hynrei kadei ba ngin pyndonkam ia ka tynrai ka jong ngi bad ban iasam lang bad kiwei pat kiba na kane ka thain bad kumjuh ban pyni ia ka jinglah ka jylla sha ki nongwan jngohkai ban tip shaphang ka bam ka jong ngi.
Ha ka sngi kaba nyngkong jong kane ka Tamasa, la sakhi ruh ïa ka jingïakren bad jingiasyllok halor ka mat ‘Perspectives on Fermentation,’ ha kaba ki nongkren ki kynthup ia u Jason White, Ahmedaki Laloo, Prachet Sancheti bad ka Kong Nongpiur bad kiwei kiwei. Ha kane ka jingialang kala don ruh ka lad ban buh jingkylli bad ban ioh ia ka jubab na ka Nambie Marak, kaba dei ka First Runner-Up jongka Master Chef India 2023 bad ka nongseng jong ka A’Kawe.
Kane ka tamasa kan long 3 sngi bad ka Culinary Cascade kan bteng ban pyni sha ki paidbah ia ka rukom shet ia ki jingbam ki bapher bapher na ki nongshet kiba pawnam kiba kynthup ia u Adonijah Lyngdoh uba la jop ia ka Hills On A Plate 2024 bad kiwei kiwei bad kan don ruh ia ka jingiatai ne jingiasyllok halor ki mat ki bapher bapher.
Ban pynsngewtynnad shuh shuh ia kane ka tamasa, ki nongrwai bad nongtem ka jylla na ka MGMP kin pynbyrngia ia ki nongwankai da ki jingrwai bad ki jingtem ki jongki khnang ba kan pynlong ia kine kiba wankai ba kin iai sah jingkynmaw.
