Shillong, Naiwieng 28: U Myntri Rangbah ka Jylla u Conrad K Sangma, hynne ka sngi, ula plie ia ka Paver Block Road ne ka surok kaba la shna da ki maw blok, hapoh jongka Smart Town Project ha Lower Hawakhana, Tura ia kaba la pynlong da ka Development Committee jongka Lower Hawakhana, Tura.
Haba kren ha ka jingialang u Myntri Rangbah ula ong, “Nga lah ioh ia ka lad ban jngoh ia ka Lower Hawakhana la bunsien haba nga leit ban ialap elekshon bad nga dap da ka jingkmen ban iohi ia ka jingkylla ha kane ka shnong mynta” bad ka bynrap, ba watla kadei kaba rit hynrei kadei pat ka skhim kaba kongsan kaba la wanrah ia ka jingkylla kaba khraw ha ka shnong.
Ula pyntip ba ia ka Paver Block Roads kadei kaba la bhah tyngka lyngba ka Smart Town Project na ka bynta bun tylli ki shnong hapoh Tura.
“Lada dei ba dang donkam ban leh shuh, ngi lah khmih ban iohi ia ka jingkylla ha Tura bad nga ngeit ba lyngba ka jingiatreilang bad jingiashimbynta, ngi lah ban pynurlong ia kiwei pat ki jingangnud kiban dang mih ha ki sngi ban wan” ula ong.
U Myntri Rangbah ula pyntip ruh ba kumba T.54 klur hapoh jongka Smart Town Project la dep ban bhah na ka bynta ki Block Road ha kylleng ki shnong hapoh Tura bad ula ong ba la bhah ruh sa T.1400 Klur na ka bynta ki projek ki bapher bapher hapoh ka sor Tura.
“Nga sngewkmen bad nga dap da ka jingsngew sarong bad ka sngewhun ban iohi ia ka jingkylla hapoh ka sor Tura” ula ong.
Ula iathuh shuh shuh, ba ka sorkar ka dang trei ban wanrah ia ka roi ka par kaba ryntih ha kylleng jong ki District Headquarter bad ruh ia ka jingkyntiew ia ka roi ka par ha ki shnong ki thaw.
Halor kiwei pat ki mat kiba la pynpaw da ka Development Committee ka Lower Hawakhana, u Myntri Rangbah ula pynthikna ban shimkhia halor ka surok kaban poi sha lum jingtep bad ban tei ia ka kynroh maw na ka bynta ka iingmane ha katei ka shnong.
Hadien kane, u Myntri Rangbah ula iakren ruh bad ki nongshong shnong kiba la pynsngew ia ka jingdonkam ban buh ia ki painkhana paidbah, ki Street Lights, CCTV bad kiwei kiwei.
