Shillong, Naiwieng 28 : Ka Shillong Lajong FC lem bad ka Laitkyrhong SC, ki la ioh ban khur ia ki nam jop ha ka lympung ialehkai ka Shillong Champions Cup, ka Shillong Sports Association, ha ki jingiakhun hynne ka sngi Thohdieng ha madan Polo.
Ha ka jingialehkai ba nyngkong jong ka sngi, ka Shillong Lajong FC, kaba dei ruh ka kynhun kaba wan ba-ar (runners up) ha ka SPL bad lahduh ka Super Cup, ka la lah ba kan pynliem da 8-0 pyrshah ia ka kynhun ialehkai jong ka Mawlynrei, ha kaba ha kane ka jingiakhun u Riborlang L Lyngkhoi, u la ioh ba un thep ia ka lai kol ne ka hat trick kaba ar ka jong u ha kane ka lympung iakhun.
Katba ka kynhun ialehkai jong ka Laitkyrhong ka la lah ba kan pynliem ia ka Mawkriah West da 5-2.
Haba phai sha ka jingjop ka Lajong, u Riborlang u la ioh ban thep ia ka hat trick kaba ar ka jong u ha ka minit kaba ba 37’, 44’, 55’ bad ia ki kol kiba sah la thep ia ki da u Emanbha Marbaniang (13’, 61’), Deibormame Tongper (65’, 89’) bad Babysunday Marngar 73’.
Ha lyndet kane ka jingjop ka Laitkyrhong ka la wan hadien ba u Wallamsuk Nongkhlaw u la lam khmat ia ka kynhun ban thep artylli ki kol ha ka minit kaba 24 bad kaba 62, bynrap biang sa da ki ar kol ba la thep da u Learningstar Warlarpih ha ka minit ba 30 bad kaba 84 bad sa shi kol la thep da u Dibinroy Nongspung ha ka minit kaba 54.
Ia ki artylli ki kol; naka bynta ka Mawkriah West la thep ia ki lyngba u Dibarson Kharbudnah (11’) and Enestar Malngiang (63’).
Kumta tad haduh ba kut jong ka jingiakhun kaba la long hynne ka sngi, na ka Group B, ka Shillong Lajong ka la ioh ba kan khur 6 point, bud pat sa ka Nongkseh bad ka Laitkyrhong kiba la ioh ban khur mar 3 point, katba ka Mawlynrei bad Mawkriah kim pat shim la ioh ban khur point satia.
