Shillong, Naitung 25: U Myntri Rangbah ka Jylla Meghalaya Conrad K. Sangma hynne ka sngi Palei, u la plie paidbah ia ka iing kaba dang shna thymmai jong ka Betasing C&RD Block kaba don ha South West Garo Hills ha ka jingiadon lang u Myntri C&RD Abu Taher Mondal, u MLA Sanjay A. Sangma, u Ian Botham K. Sangma, bad u Subir Marak.
Haba kren ha kane ka sngi u Myntri Rangbah ula pyntip ba ka Sorkar ka don ia ka jingangnud ban kyntiew ia ki jingtei ha ki nongkyndong khnang ban pynthikna ba ki jingshakri paidbah kin poi bha sha ki paidbah.
“Kum ka sorkar, ngi la kut jingmut ban pynbha ïa ki jingtei jong ngi ha nongkyndong ban pynbeit ryntih ïa ka jingshakri paidbah. Da kane ka jingthmu, ngi shna thymmai ïa ki block ophis, pynthymmai bad shna ïa ki Primary Health Centre (PHC) bad Community Health Centre (CHC), bad kyntiew kyrdan ïa ki Government Lower Primary School ha kylleng ka jylla,” ong u Conrad.
U Conrad ula pyntip ruh ba ka Sorkar ka la kynshew pisa bha ha ki jingtei ha ki jaka nongkyndong, bad haduh T.120 klur la mang na ka bynta ban shna ia ki Ophis jong ki block thymmai bad bynrap daka ba ong “Haduh 60 percent na kine ki Ophis ki block thymmai yn sa pyndep bad plie noh hapoh une u snem,”.
Ban pynjanai shuh shuh ia ka jingtreikam bad ka jinglah ban ioh ia ki block ophis, u Myntri Rangbah ka jylla u Conrad K Sangma ula bthah ia u Deputy Commissioner ka South West Garo Hills ban aiti ia ki jingtyrwa na ka bynta ban pynbha shuh shuh ia ki jingtei.
“Ngi kwah ban pynthikna ba haba ki briew ki wan jngoh sha ki block ophis kin ioh ia ka jaka kaba suk ban shong ban ap. Ka jingmut baroh kawei ka long ba ki briew ki dei ban ioh ia ka jingshakri kaba bha khlem da iakynduh jingeh ei ei. Ka jingpyrshang jong ngi ka long ban shakri ïa ki paidbah” u la bynrap
