Shillong, May 15: U Myntri Rangbah ka Jylla Meghalaya Conrad K. Sangma hynne ka sngi Palei, ula plie ia ka ophis ba thymmai jong ka SIROBILT Software Services Pvt. Ltd, ka kompani IT na ri America hapoh ka IT Park, Mawdiangdiang, Shillong.
“Ka jingdon ka SIROBILT ha ka thain ka pyni ia ka jingiaid shakhmat jong ki trai shnong ki jong ngi ha kaba iadei bad ka kam IT. Ka kompani ka don jingthmu ban pynrungkam sa 300 ngut ki stad Software, kana long kai kabu kiba kordor na ka bynta ki samla bad ban kyntiew ia ka iohkam iohjam ha kaba iadei bad ka lain teknoloji” la ong u Myntri Rangbah.
Ka SIROBILT ka dei ka kompani kaba 5 ban seng ia ka jaka treikam ha Shillong Tech Park.
“Ka jingdon jong ki kynhun na ka ri bad nabar ka ri ha ka lain IT kila iarap ban pyndon ia ka jylla Meghalaya ha ka kyrdan ka ban long kum ka jaka khaii pateng ha ka liang ka teknoloji. Ka jylla ka don ia ki briew kiba la tbit bad ka sorkar ka kyrshan ia ki kam ai jingshakri lyngba ka IT, ka ban plie lad ia ki samla ka jylla” ula bynrap.
U Myntri Rangbah ula ong ba ka sorkar ka dang ialeh ban kynshew tyngka bha ha ka liang ka IT, kum shi bynta jong ka jingiohi jngai ban thaw ia ka jingpynkup bor ha ka liang ka Digital bad ban pynlong ia ki samla kiban shaniah halade ha ka ioh ka kot.
Ka jingpyniar ia ka Shillong Tech Park (Phase – II) kan khring shuh shuh ia ki IT company, start-ups bad ka jingbuh ia ka shlem jong ka Skill Development halor ki digital technology, kum ka AI, Blockchain bad Cloud Computing.
U Myntri Rangbah ula pyntip ruh ba ka sorkar ka kyrshan ia ki start-ups bad ia ki company kiba kloi ban kynshew tyngka ha ka lain IT.
“Ki samla ka Meghalaya kidei ki bor ki jongka. Lyngba ki jingbei tyngka ki jong ngi ha ki jingtei kiba iadei bad ki kam digital bad ka jingiatreilang hapdeng ka sorkar bad ki riewshimet, ngi ngin sa plie ia kata ka jinglah ka jongki bad ailad ia ki ban iadonbynta ha ka Global Tech Revolution,” ong u Myntri Rangbah.
