Shillong, Jymmang 15: U Myntri ka tnat Community & Rural Development (C&RD) u AT Mondal hynne ka sngi Palei, u la pynthikna ba un sa iakren bad u Myntri Rangbah ka Jylla Conrad K Sangma halor ka jingtyrwa ban pynkha ia ka Umden C&RD block, Ri Bhoi district.
Ia kane u Myntri u la pynthikna hakhmat ka Nongtluh Mathan Marmain Development Forum (NMMDF) ba la ialam da u MLA ka Nongpoh u Bah Mayralborn Syiem.
“Ngin peit kumno ka jingiakren kan long namar ngi hap ban rah ia kane ka jingdawa bad u Myntri Rangbah ka Jylla, bad ka tnat Planning bad ka tnat Finance bad nangta ngin sa lah ban shim rai” la ong u Mondal.
U Mondal u la iathuh ruh ba ïa kane ka jingdawa naka liang u MLA ka Nongpoh ruh u la kren hapoh ka iingdorbar thawain ka Jylla
Haba pynpaw ba ka jingthaw ïa ki block ka dei ka kam kaba ïai bteng, u Mondal u la ong, “(Yn thaw ïa ki block thymmai) hadien ba ka Sorkar kala ibkt. Ka sorkar ka la thaw ha ki por ba la dep ruh. Mynta u snem, ngi la thaw ïa ka block Mawhati ha Ri Bhoi.”
U Myntri u la ong ba ka Forum ka la tyrwa ba ia ka block thymmai yn ai kyrteng kum ka Umden C&RD block.
Hadien ba la iakynduh ia u Myntri, naka liang u MLA ka Nongpoh u Bah Mayralborn Syiem u la pynthikna ba un iai bteng ban rah ia katei ka jingdawa sha ka Sorkar na ka bynta ban thaw noh mardor ia katei ka Block kaba thymmai.
“Nga sngewnguh kum u MLA ka thain ba kane Forum ka la shim khia ban kyrshan ia kane ka jingdawa khnang ba ka Sorkar kan shim khia ban thaw ia ka Umden C&RD block daka ba phiah naka Umling block,” u la ong.
“Kum u nongthaw ain, ngan pyrshang ban rah ia kane ka jingdawa bad pynbor ia u Myntri Rangbah ka Jylla ban pynurlong bad ngi kyrmen ba ka Sorkar ha ka por kaba biang kan thaw ia ki block kiba thymmai bad ka Umden C&RD kan long kawei na ki. Nga kyrmen ba ka ki paidbah naki 250 tylli ki shnong kin ioh jingmyntoi lada ka Sorkar ka pynurlong ia kane ka jingdawa” u la bynrap.
