Shillong ,Kyllalyngkot 22: U Myntri Rangbah ka jylla u Conrad K. Sangma hynne ka sngi Balang, ula plie paidbah ïa ka ophis treikam jong ka Hima Mawphlang kaba don ha Lumrynkew Mawiong, Mawphlang kaba hap ha East Khasi Hills.
Haba kren ha ka jingïalang u Myntri Rangbah ula ong ba ka jingplie ïa kane ka ophis treikam ka dei kaban sah jingkynmaw namar ba ka Hima kala im bad kala leh ïa ki kam kiba kyntang la jan 1000 snem khlem ka ophis.
Ula ong ba ka Hima Mawphlang ka dei ka nongkynti jong u paidbah bad kala ïeng kum ka shap jong ka kolshor, ka riti dustur bad ka jinglong tynrai kaba kyrpang.
Ula pynthikna ruh ban bhah tyngka na ka bynta ban pynioh ïa ki jingdonkam ha katei ka ophis treikam jong ka Hima.
U Conrad ula iaroh ruh ïa ka shnong Mawphlang kum ka jaka jngohkai kaba don ïa ka Law Kyntang bad ka Heritage Village bad ula pynbna ba la bhah T.25 Klur lyngba ka Swadesh Darshan Scheme na ka bynta ka Tourism Center bad ban tei ïa ki jingtei kiba donkam ha ki jaka kiba don hajan ka Law Kyntang.
Ula pynbna ruh ba la mang na ka bynta ki kam kiba lait ha ka Mawphlang Science & Commercial College bad ki klas kin sa sdang noh naduh mynta u snem.
U Myntri Rangbah ula pynbna ruh ban ai T.1 Lak ïa ka Mawphlang Secondary School bad T.1 Lak ïa u bah Pynshailang Lyngdoh bad ka kynhun ka jongu ban ioh thied ïa ki tiar tem.
Ula kyntu ïa ka Hima Mawphlang ban pynthikna ba ïa ka nongkynti kaba riewspah ka jongki dei ban buh ha ki jingthoh kiba bniah ban pynneh pynsah na ka bynta ki pateng ban dang wan khnang ban ioh ban sam ïa ki jingtip sha ka pyrthei bad ual ong ba yn pyniar ïa ka CM Research Grant na ka bynta ban leh Research ha kane ka thaiñ.
