Shillong, K’lyngkot 22 : U Myntri Rangbah ka Jylla Conrad K Sangma ha ka sngi Balang, ula plie paidbah ia ka Indoor Sports Hall ka shnong Lummawbah haba ai burom ia ka jingseisoh ka jingtei sha u MLA barim Bah Hamletson Dohling bad ka Dorbar Shnong.
Ia kane ka Indoor Sports Hall la plie ha ka jingiadonlang u Bah Hamletson Dohling uba dei ruh u Adviser u Myntri Rangbah. Ia kane ka Indoor Sports Hall la pyntrei ha ka jinglut kaba kot T.1.55 klur.
Haba kren ha ka jingialang, u Myntri Rangbah ula pynpaw ba ka jingmih jong kane ka jaka ialehkai ka dei namar ka jingtrei shitom jong u Bah Hamletson Dohling bad ka Dorbar Shnong kiba la shimkhia bha ban pyndep ia ka.
“Nga kmen ban iohi mynta ka sngi, ka Shnong, ki Nongialam sain pyrthei bad ka Sorkar kila iatreilang ha kaban kyntiew ia ka shnong ka thaw, ka imlang sahlang bad ka Jylla baroh kawei” ula ong.
“Ka Sorkarka ngeit ha ka jingiatreilang bad ka Shnong ka Thaw haba burom ruh ia ka kolshor, ki dustur bad ki jingleh tynrai bad dei namar kata balei ba baroh ki prokram bad ki polici ka Sorkar ki ban jur ia ka jingiashim bynta lang ki shnong ki thaw” ula bynrap.
U Myntri Rangbah ula kular ruh ban ai ia baroh ki jingkyrshan ha kaban pynlong ia ka Lummawbah Indoor Sports Hall kum ka jaka ialehkai kaba thnem bha ha kaba ki samla kin mih ban iashimbynta ha ki jingialehkai bapher bapher.
“La iohi ba ka Tnad Sports bad ki madan ialehkai ha kine ki 7 snem kila kylla shibun bah ban ai ka lad ka kabu ia ki samla ba kin sei iala ka jong ka sap” ula ong.
Halor ki jingdonkam jong ka Shnong ban ioh ia ki kam pynroi, u Myntri Rangbah ula kular ba un sa khmih ia ki jingdawa kiba la buh hakhmat jong u da ki nongialam shnong. Ula kular ruh ban tuklar halor ka jingtyrwa jong ka Dorbar Shnong sha ka Tribal Affairs Ministry ka Sorkar India ban pynioh ia ka Auditorium jong ka Arts & Culture.
